Kalki 2898 AD: కల్కి 2898 AD పార్ట్ 2 షూటింగ్ మొదలయ్యేది అప్పుడే ..కీలక సమాచారం ఇచ్చిన నిర్మాతలు
ఇటీవల పాన్ ఇండియా బాక్సాఫీస్ వద్ద సరికొత్త రికార్డ్స్ సృష్టించిన చిత్రం "కల్కి 2898 AD." యంగ్ రెబల్ స్టార్ ప్రభాస్ ప్రధాన పాత్రలో నటించిన ఈ సినిమా,డైరెక్టర్ నాగ్ అశ్విన్ దర్శకత్వంలో థియేటర్లలో సందడి చేసింది. ఈ భారీ బడ్జెట్‌ చిత్రాన్ని వైజయంతి మూవీస్ బ్యానర్‌లో అశ్వినీదత్‌ నిర్మించారు. భారీ అంచనాల మధ్య జూన్27న విడుదలైన ఈ సినిమా దాదాపు రూ.1200కోట్ల పైగా వసూలు చేసింది. ఇందులో బాలీవుడ్ స్టార్ అమితాబ్ బచ్చన్, దీపికా పదుకొణే, దిశా పటానీ, దుల్కర్ సల్మాన్,కమల్ హాసన్,విజయ్ దేవరకొండ,శోభన,మాళవిక నాయర్ వంటి ప్రముఖులు కీలక పాత్రల్లో నటించారు. మలయాళం,తమిళం,హిందీ,కన్నడ ఇండస్ట్రీల నుండి పలువురు స్టార్స్ ముఖ్య పాత్రల్లో కనిపించి ప్రేక్షకులను ఆకట్టుకున్నారు.
కల్కి 2 గురించి తాజా అప్డేట్స్
మహాభారతం ఆధారంగా నాగ్ అశ్విన్ రూపొందించిన ఈసైన్స్ ఫిక్షన్ మూవీ సీనీ ప్రియులను విపరీతంగా ఆకర్షించింది. డైరెక్టర్ మేకింగ్, ప్రభాస్ యాక్టింగ్, విజువల్ ఎఫెక్ట్స్ పై విమర్శకులు ప్రశంసలు కురిపించారు. ఈ మూవీకి సీక్వెల్ ఉన్నట్లు ఇప్పటికే ప్రకటించడంతో కల్కి 2 కోసం ప్రేక్షకులు ఎంతో ఆసక్తిగా ఎదురుచూస్తున్నారు. ఈ నేపథ్యంలో, నిర్మాతలు స్వప్నదత్, ప్రియాంకదత్ రష్యాలోని మాస్కో ఇంటర్నేషనల్ ఫిల్మ్ వీక్ లో పాల్గొన్నారు. అక్కడ వారు కల్కి 2 గురించి కొన్ని తాజా అప్డేట్స్ అందించారు. జనవరి, ఫిబ్రవరిలో సీక్వెల్ షూటింగ్ ప్రారంభం కానుందని తెలిపారు. షూటింగ్ ప్రారంభమైన తర్వాత, పార్ట్ 2 గురించి మరిన్ని వివరాలు ప్రకటిస్తామని చెప్పారు.
కల్కి 2లో కమల్ హాసన్ పాత్ర నిడివి ఎక్కువగా..
ప్రియాంకదత్ మాట్లాడుతూ.. కల్కి విడుదల సమయంలో ఎన్నో ప్రశంసలు అందాయని, ప్రపంచం నలుమూలల నుండి మెసేజ్ లు వచ్చాయని, వారు స్వచ్ఛందంగా సినిమాను ప్రచారం చేశారని చెప్పారు. కాగా, కల్కి సక్సెస్ సెలబ్రేషన్స్ ఇంకా జరగలేదు, ప్రస్తుతం వాట్సాప్ లో మాత్రమే వేడుకలు జరుగుతున్నాయని పేర్కొన్నారు. కల్కి 2లో కమల్ హాసన్ పాత్ర నిడివి ఎక్కువగా ఉంటుందని ఇప్పటికే దర్శకుడు నాగ్ అశ్విన్ హింట్ ఇవ్వడంతో పార్ట్-2పై కూడా అభిమానుల్లో భారీ అంచనాలు నెలకొన్నాయి.
