Telangana: రాష్ట్రంలో 11% లోటు వర్షపాతం.. 10 జిల్లాల్లో వర్షాభావం..

వ్రాసిన వారు Sirish Praharaju

Jul 10, 2025

12:14 pm

ఈ వార్తాకథనం ఏంటి

వానాకాలం ప్రారంభమైనప్పటి నుంచి తెలంగాణలో ఇప్పటివరకు సగటు వర్షపాతంతో పోల్చితే సుమారు 11 శాతం తక్కువ వర్షం కురిసిందని వ్యవసాయ శాఖ వెల్లడించింది. సాధారణంగా 185.4 మిల్లీమీటర్ల వర్షం పడాల్సి ఉండగా,ఇప్పటివరకు కేవలం 165.5 మిల్లీమీటర్ల వర్షపాతమే నమోదైనట్లు పేర్కొంది. ఈ తక్కువ వర్షపాతం పత్తి,కందులు,సోయాబీన్, పెసలు, మినుములు, జొన్న, చెరకు వంటి పంటల సాగుపై ప్రతికూల ప్రభావం చూపిందని వివరించింది. ఈ విషయాలన్నీ బుధవారం రాష్ట్ర ప్రభుత్వానికి అందజేసిన నివేదికలో వెల్లడించింది. ఈ వానాకాలంలో 57.02 లక్షల ఎకరాల్లో పంటలు వేసే లక్ష్యంగా ఉన్నప్పటికీ, రైతులు ఇప్పటివరకు 56.26 లక్షల ఎకరాల్లో మాత్రమే సాగు చేపట్టినట్లు పేర్కొంది. అంటే సాధారణ విస్తీర్ణంతో పోలిస్తే సుమారు 76,000 ఎకరాల్లో పంటల సాగు తగ్గింది.

వివరాలు

రాష్ట్రంలో 27.3 మిల్లీమీటర్ల వర్షం

అయితే, కొన్ని పంటల విషయంలో వ్యత్యాసం కనిపించింది. వరి సాగు సామాన్య స్థాయి కంటే లక్ష ఎకరాల్లో అధికంగా సాగగా, మొక్కజొన్న సాగు రెండు రెట్లు పైగా విస్తరించింది. గత వారం మొత్తం రాష్ట్రంలో 27.3 మిల్లీమీటర్ల వర్షం కురిసినప్పటికీ, సూర్యాపేట జిల్లాలో కేవలం 2.9 మి.మీ. వర్షమే పడిందని పేర్కొంది. నల్గొండ, యాదాద్రి భువనగిరి, జనగామ, మేడ్చల్, మంచిర్యాల, పెద్దపల్లి, సంగారెడ్డి, జయశంకర్ భూపాలపల్లి, హైదరాబాద్‌ జిల్లాల్లో వర్షపాతం సాధారణ స్థాయికి తక్కువగా నమోదైంది. మిగతా 23 జిల్లాల్లో మాత్రం సాధారణ వర్షపాతం కనిపించిందని నివేదికలో పేర్కొంది. వచ్చే వారం వర్షాల పరిస్థితి తృప్తికరంగా ఉండే అవకాశం ఉందని వాతావరణ శాఖ అంచనా వేసిందని వ్యవసాయశాఖ తెలిపింది.

వివరాలు

16 జిల్లాల్లో 26 శాతం నుంచి 40 శాతం మధ్యలో పంటల సాగు

జిల్లాలవారీగా సాగు విస్తీర్ణాలను పరిశీలిస్తే, సూర్యాపేట, కరీంనగర్, పెద్దపల్లి, జగిత్యాల, మెదక్, మేడ్చల్, వనపర్తి, సిరిసిల్ల, ములుగు జిల్లాల్లో 25 శాతం కన్నా తక్కువ విస్తీర్ణంలో మాత్రమే పంటలు వేసినట్లు గుర్తించారు. 16 జిల్లాల్లో 26 శాతం నుంచి 40 శాతం మధ్యలో పంటల సాగు జరిగింది. మరో ఐదు జిల్లాల్లో 60 శాతం వరకు సాగు పూర్తవగా, ఆదిలాబాద్, కుమురంభీం జిల్లాల్లో 75 శాతం విస్తీర్ణంలో పంటలు వేసినట్లు నివేదిక తెలిపింది.