Rafale-M fighters: భారత్ నౌకాదళంలోకి 26 రాఫెల్-ఎం విమానాలు; ఫ్రాన్స్‌తో కీలక ఒప్పందం!
ఈ వార్తాకథనం ఏంటి
పాకిస్థాన్, చైనాలతో విభేదాల నేపథ్యంలో భారతదేశం తన సైనిక శక్తిని పెంచుకోవడంపై నిరంతరం దృష్టి సారిస్తోంది.
గత కొన్నేళ్లలో రక్షణరంగంలో భారత్ అనేక సాంకేతిక పరిజ్ఞానాలు, ఆయుధాలను కొనుగోలు చేసింది.
తాజాగా ఫ్రాన్స్‌తో భారత్ రాఫెల్-ఎం(Rafale-M)ఒప్పందం కుదుర్చుకోనున్నట్లు ప్రభుత్వ వర్గాలు చెబుతున్నాయి.
ఫ్రాన్స్ నుంచి భారత్ ఇప్పటికే వైమానికదళం కోసం రాఫెల్ యుద్ధ విమానాలను కొనుగోలు చేసింది.
అయితే ఇప్పుడు నావికా దళం కోసం రాఫెల్-ఎం విమానాలను కొనేందుకు సిద్ధమవుతోంది.
ఐఎన్ఎస్ విక్రాంత్ కోసం భారత్ 26 రాఫెల్-ఎం యుద్ధ విమానాలు, మూడు అటాక్ సబ్‌మెరైన్‌లను కొనుగోలు చేయాలని భారత్ నిర్ణయించింది. ప్రధాని నరేంద్ర మోదీ జులై 13,14తేదీల్లో ఫ్రాన్స్‌లో పర్యటించనున్నారు.
ఈ పర్యటనలోనే ఒప్పందంపై మోదీ సంతకం చేసే అవకాశం ఉంది.
భారత్
జులై 13న డిఫెన్స్ అక్విజిషన్ కౌన్సిల్ సమావేశం
14న జరిగిన ఫ్రాన్స్ జాతీయ దినోత్సవంలో బాస్టిల్ డే పరేడ్‌ పాల్గొనాలని ప్రధాని నరేంద్ర మోదీని ఆ దేశ అధ్యక్షుడు మక్రాన్ ప్రత్యేకంగా ఆహ్వానించారు.
ఫ్రాన్స్ పర్యటన సందర్భంగా ప్రధాని మోదీ 26 రాఫెల్ ఎం సముద్ర యుద్ధ విమానాలను కొనుగోలు చేయడానికి బిలియన్ డాలర్ల ఒప్పందాన్ని కుదుర్చుకునే అవకాశం ఉంది.
జులై 13న ప్రధాని మోదీ ఫ్రాన్స్ పర్యటనకు ముందు రక్షణ మంత్రిత్వ శాఖ ఆధ్వర్యంలో డిఫెన్స్ అక్విజిషన్ కౌన్సిల్ (డీఎసీ) సమావేశం జరగనుంది.
భారత నౌకాదళానికి 26 రాఫెల్-ఎమ్ యుద్ధ విమానాల కొనుగోలు ప్రతిపాదనకు జూలై 13న జరగనున్న సమావేశంలో ఆమోదం తెలిపే అవకాశం ఉంది.
భారత్
రాఫెల్-ఎమ్ ప్రత్యేకతలు ఇవే
ఫ్రాన్స్ నుంచి భారత్ 26రాఫెల్-ఎమ్ విమానాలను కొనుగోలు చేయనుంది. రాఫెల్-ఎమ్ అనేది ఒక సముద్ర యుద్ధ విమానం.
రాఫెల్-ఎమ్ యుద్ధ విమానానికి రాఫెల్ మారిటైమ్ అని పేరు పెట్టారు.
ఫ్రెంచ్ కంపెనీ డస్సాల్ట్ ఏవియేషన్ రాఫెల్-ఎం విమానాన్ని తయారు చేసింది. రాఫెల్ కంటే 80శాతం అత్యాధునిక సాంకేతికతతో రాఫెల్-ఎమ్ విమానాన్ని తీర్చి దిద్దారు.
అమెరికా పర్యటన తర్వాత ప్రధాని మోదీ చేపడుతున్న ఫ్రాన్స్ పర్యటన భారత రక్షణ రంగానికి చాలా కీలకంగా మారనుంది.
ఫ్రాన్స్‌కు చెందిన రాఫెల్-ఎమ్ ఫైటర్ జెట్లను సముద్ర నిఘా, పోరాటానికి ఉపయోగిస్తారు.
అమెరికన్ ఫైటర్ హార్నెట్ కంటే ఈ విమానం మెరుగ్గా ఉంటుందని నిపుణులు చెబుతున్నారు.
విమాన వాహక నౌక ఐఎన్ఎస్ విక్రాంత్‌లో రాఫెల్-ఎమ్ ఫైటర్ జెట్లను మోహరించనున్నారు.
భారత్
రాఫెల్-ఎమ్ విమానం బరువు 10,600 కిలోలు
రాఫెల్-ఎమ్ సముద్ర యుద్ధ విమానం 15.27మీటర్ల పొడవు, 5.34 మీటర్ల ఎత్తు, 10,600కిలోల బరువు ఉంటుంది. దీని ఇంధన సామర్థ్యం 4700కిలోలు.
అత్యధిక ఎత్తులో రాఫెల్-ఎమ్ విమానం గంటకు 1912కిలోమీటర్ల గరిష్ట వేగంతో దూసుకెళ్తుంది. తక్కువ ఎత్తులో దాని వేగం గంటకు 1390 కిలోమీటర్లు ఉంటుంది.
ఇది మూడు డ్రాప్ ట్యాంకులతో 3700 కి.మీ ప్రయాణిస్తుంది. ఈ విమానం యుద్ధనౌకల్లో టేకాఫ్, ల్యాండ్ సులువుగా అవుతుంది.
గతంలో ఫ్రాన్స్ నుంచి భారత్ రాఫెల్ జెట్లను కొనుగోలు చేసింది. ప్రస్తుతం భారత వైమానిక దళం వద్ద 36రాఫెల్ విమానాలు ఉన్నాయి.
ఫ్రాన్స్ నుంచి కొనుగోలు చేసిన 4.5 తరం రాఫెల్ యుద్ధ విమానాలు ప్రపంచంలోనే అత్యంత అధునాతన సాంకేతికతను కలిగి ఉన్నాయి.