Bharat Bandh: నేడు భారత్ బంద్.. కొనసాగుతున్న రైతుల ఆందోళనలు
సంయుక్త కిసాన్ మోర్చా,కేంద్ర కార్మిక సంఘాలు నేడు గ్రామీణ భారత్ బంద్ కు పిలుపునిచ్చాయి. ఇప్పటికే ఉదయం 6 గంటలకు ప్రారంభమైన 'భారత్ బంద్' సాయంత్రం 4 గంటల వరకు కొనసాగనుంది. నిరసన తెలుపుతున్న రైతులు మధ్యాహ్నం 12 గంటల నుండి సాయంత్రం 4 గంటల వరకు ప్రధాన భారతీయ రహదారులపై భారీ 'చక్కా జామ్'లో పాల్గొంటారు. అత్యవసర సేవలకు ఇందులో మినహాయింపు ఉంటుంది. సెక్షన్ 144 విధించినందున దిల్లీ, దాని దేశ రాజధాని ప్రాంతం (NCR) లో పెద్ద సమావేశాలు నిషేధించబడ్డాయి. నోయిడాకు చెందిన భారతీయ కిసాన్ పరిషత్ దేశవ్యాప్త సమ్మెకు మద్దతు ఇవ్వడంతో ఆందోళనను తీవ్రతరం చేస్తామని రైతులు ప్రతిజ్ఞ చేశారు.
ఆదివారం మరోసారి చర్చలు
నిరసన తెలుపుతున్న రైతు సంఘాల నేతలు, ముగ్గురు కేంద్ర మంత్రుల మధ్య ఐదు గంటలపాటు జరిగిన మారథాన్ చర్చ గురువారం ఎలాంటి పురోగతి సాధించలేదు. ఆదివారం (ఫిబ్రవరి 18) మరో రౌండ్ చర్చ జరగనుంది. ఢిల్లీ, పంజాబ్, హర్యానా సరిహద్దుల్లో మోహరించిన పారామిలటరీ బలగాలు ఆందోళన చేస్తున్న రైతులను రెచ్చగొడుతున్నాయని గురువారం కేంద్రంతో తమ చర్చల సందర్భంగా రైతులు అన్నారు. చర్చానంతరం 'ఇండియా టుడే'తో రైతు నాయకుడు జగ్జిత్ సింగ్ దల్లెవాల్ మాట్లాడుతూ, ''మేము పాకిస్థానీలం కాదు. పరిష్కారం లభిస్తుందని రైతులు ఆశిస్తున్నారని, వారి ఆందోళన మరింత ఉధృతం అవుతుందని, వారు ఇంకా "ఢిల్లీకి వెళ్లాలని ప్లాన్ చేస్తున్నారు" అని ఆయన అన్నారు.
రైతులకు సంఘీభావం తెలిపిన పంజాబ్ సీఎం
పంజాబ్ ముఖ్యమంత్రి, AAP నాయకుడు భగవంత్ మాన్ నిరసన తెలిపిన రైతులకు సంఘీభావం తెలిపారు. హర్యానాతో రాష్ట్ర సరిహద్దుల్లో డ్రోన్లను ఉపయోగించడం, ముళ్ల కంచెలు వేయడంపై విమర్శలు చేశారు. అటువంటి ప్రవర్తనను "సవతి-తల్లిప్రేమ" అని పిలిచిన ఆయన, మూడు హర్యానా జిల్లాల్లో ఇంటర్నెట్ సేవలను నిలిపివేయడాన్ని కూడా విమర్శించారు. కేంద్రం, రైతు సంఘాల మధ్య గురువారం జరిగిన మూడో దఫా చర్చలు అర్థరాత్రి వరకు సాగాయి. రైతుల 'ఢిల్లీ చలో' ఆందోళన మంగళవారం (ఫిబ్రవరి 13) ప్రారంభం కావడానికి ముందు ఫిబ్రవరి 8,12 తేదీల్లో రెండు రౌండ్ల చర్చలు జరిగాయి. అయితే, రెండూ విఫలమయ్యాయి.
రైతులపై టియర్ గ్యాస్ ,వాటర్ ఫిరంగులు
పంజాబ్ నుండి రైతులు ఫిబ్రవరి 13న దేశ రాజధానికి తమ మార్చ్‌ను ప్రారంభించారు. అయితే దిల్లీ,హర్యానా మధ్య శంభు, ఖనౌరీ సరిహద్దుల వద్ద భద్రతా సిబ్బంది వారిని అడ్డుకున్నారు. అప్పటి నుంచి నిరసన తెలుపుతున్న రైతులు ఈ సరిహద్దు పాయింట్ల వద్దే మకాం వేశారు. ఉత్తర్‌ప్రదేశ్, హర్యానా నుండి నిరసన తెలుపుతున్న రైతులు మంగళవారం ఢిల్లీకి తమ పాదయాత్రను ప్రారంభించారు. ఫిబ్రవరి 13న శంభు, ఖనౌరీ సరిహద్దుల వద్ద హర్యానా పోలీసులు నిరసన తెలుపుతున్న రైతులపై టియర్ గ్యాస్ షెల్లు,వాటర్ ఫిరంగులను ఉపయోగించారు. ప్రధానంగా పంజాబ్‌కు చెందిన రైతులు, బారికేడ్లను బద్దలు కొట్టేందుకు ప్రయత్నించడంతో రెండు సరిహద్దు పాయింట్ల వద్ద హర్యానా పోలీసులతో ఘర్షణ పడ్డారు.
144 కింద ఆంక్షలు
దిల్లీ -ఎన్‌సీఆర్‌లో రైతుల ఆందోళనల మధ్య వాహనాల రాకపోకలు తీవ్రంగా దెబ్బతిన్నాయి. భారత్ బంద్ నేపథ్యంలో నోయిడా, గ్రేటర్ నోయిడాతో సహా జిల్లా అంతటా అనధికార బహిరంగ సభలపై నిషేధం సహా CrPC సెక్షన్ 144 కింద ఆంక్షలు విధించినట్లు గౌతం బుద్ధ్ నగర్ పోలీసులు గురువారం తెలిపారు.
