ఒడిశా రైలు ప్రమాద ఘటన నేపథ్యంలో 18 రైళ్లు తాత్కాలికంగా రద్దు
ఈ వార్తాకథనం ఏంటి
ఒడిశా రాష్ట్రంలో ఘోర రైలు ప్రమాదం జరిగిన నేపథ్యంలో సుదూర ప్రాంతాలకు వెళ్లే దాదాపు 18 రైళ్లను అధికారులు తాత్కాలికంగా నిలిపివేశారు.
ఈ మేరకు టాటానగర్‌ రైల్వే స్టేషన్‌ మీదుగా మరో ఏడు రైళ్లను దారి మళ్లించినట్లు వెల్లడించారు.
హౌరా - పూరీ సూపర్‌ఫాస్ట్‌ (12837), హౌరా - బెంగళూరు సూపర్‌ఫాస్ట్‌ (12863), హౌరా - చెన్నై మెయిల్‌ (12839), హౌరా -సికింద్రాబాద్‌ (12703), హౌరా - హైదరాబాద్‌ (18045), హౌరా - తిరుపతి (20889), హౌరా - పూరీ సూపర్‌ఫాస్ట్‌ (12895), హౌరా - సంబల్‌ పూర్‌ ఎక్స్‌ప్రెస్‌ (20831), సంత్రగాచి - పూరీ ఎక్స్‌ప్రెస్‌ (02837) రైళ్లు రద్దైన జాబితాలో ఉన్నాయని రైల్వే ఆఫీసర్లు స్పష్టం చేశారు.
Odisha Railway Accident
గోవా - ముంబయి వందేభారత్ ఎక్స్ ప్రెస్ రైలు ప్రారంభం వాయిదా
బెంగళూరు - గువాహటి (12509) రైలును విజయనగరం, టిట్లాగఢ్‌, టాటా మీదుగా దారి మళ్లించారు. ఖరగ్‌పుర్‌ పరిధిలోని చెన్నై సెంట్రల్‌ - హౌరా (12840) రైలును జరోలి మీదుగా, వాస్కోడగామా - షాలిమార్‌ (18048), సికింద్రాబాద్‌ - షాలిమార్‌ (22850) వారాంతపు రైళ్లను కటక్‌ మీదుగా దారి మళ్లించామన్నారు.
ఘటనతో గోవా - ముంబయి వందేభారత్ నూతన ప్రారంభోత్సవాన్ని వాయిదా వేసినట్లు కొంకణ్‌ రైల్వే అధికారులు శుక్రవారం తెలిపారు.
ముందుస్తు షెడ్యూల్ మేరకు శనివారం ఉదయం వీడియో అనుసంధానం ద్వారా ప్రధాని ఈ రైలుకు పచ్చజెండా ఊపి ప్రారంభించాల్సి ఉంది.
మరోవైపు దుర్ఘటనపై ఏఐసీసీ తీవ్ర విచారం వ్యక్తం చేసింది. కష్టకాలంలో ఒడిషా ప్రజలకు తోడుగా నిలవాలని కాంగ్రెస్‌ శ్రేణులకు సూచించారు.