PM Modi: శనివారం ద్వారకా ఎక్స్‌ప్రెస్‌వే, అర్బన్ ఎక్స్‌టెన్షన్ రోడ్-2ను ప్రారంభించనున్న మోదీ
ఈ వార్తాకథనం ఏంటి
ప్రధాన మంత్రి నరేంద్ర మోదీ ఈ నెల 16న (శనివారం) ఢిల్లీలోని అర్బన్ ఎక్స్‌టెన్షన్ రోడ్-2 (యూఈఆర్-2)తో పాటు ద్వారక ఎక్స్‌ప్రెస్‌వే ఢిల్లీ విభాగాన్ని ప్రారంభించనున్నారు. ఈ కొత్త రోడ్లతో నోయిడా నుంచి ఇంద్రగాంధీ అంతర్జాతీయ విమానాశ్రయానికి వెళ్లే సమయం గణనీయంగా తగ్గనుందని అధికారులు చెబుతున్నారు. ప్రస్తుతం నోయిడా నుంచి ఐజిఐ ఎయిర్‌పోర్ట్‌కి రోడ్డు మార్గంలో వెళ్తే కనీసం గంటకు పైగా పడుతుంది. పీక్ అవర్స్‌లో అయితే సమయం మరింత పెరుగుతుంది. అయితే యూఈఆర్-2, ద్వారక ఎక్స్‌ప్రెస్‌వేలు ప్రారంభమైన తర్వాత ఆ ప్రయాణ సమయం కేవలం 20 నిమిషాలకు తగ్గిపోనుంది.
వివరాలు
యూఈఆర్-2 అంటే ఏమిటి?
యూఈఆర్-2 ఢిల్లీకి కొత్త 'ఔటర్ రింగ్ రోడ్'గా మారబోతోంది. ఇది సోనిపట్, పానిపట్, కర్నాల్, అంబాలా, రోహ్తక్, జింద్, బహదుర్గఢ వంటి ఎన్సీఆర్ నగరాలను ఢిల్లీలోని ముఖ్య ప్రాంతాలతో నేరుగా కలుపుతుంది. అంతేకాకుండా, విమానాశ్రయానికి సులభమైన కనెక్టివిటీని ఇస్తుంది. నాలుగు నుంచి ఆరు లైన్లతో నిర్మించిన ఈ రోడ్డు రూ.8,000 కోట్ల వ్యయంతో రూపొందించబడింది. ఢిల్లీ-చండీగఢ్ హైవే (ఎన్‌హెచ్-44)లోని అలిపూర్ వద్ద ప్రారంభమై, ముండ్కా, బక్కర్వాలా, నజఫ్‌గఢ్, ద్వారక ప్రాంతాల మీదుగా వెళ్ళి ఢిల్లీ-జైపూర్ హైవే (ఎన్‌హెచ్-48)లోని మహిపాల్పూర్ వద్ద కలుస్తుంది. ఈ రహదారి ఢిల్లీలోని ఎన్‌హెచ్-9, ఎన్‌హెచ్-48లను కలుపుతుంది.
వివరాలు
నోయిడా నుంచి ఐజిఐకి 20 నిమిషాల్లో ఎలా చేరుకోవచ్చు?
ప్రస్తుతం నోయిడా నుంచి రింగ్ రోడ్ లేదా డీఎన్‌డీ ఫ్లైవోవర్ మీదుగా అశ్రామ్ చౌక్, ఆపై ఢౌలాకువాన్/మహిపాల్పూర్ మార్గం దాటి ఎయిర్‌పోర్ట్‌కి చేరుకోవాలి. కానీ కొత్త రహదారి తెరవడంతో సెంట్రల్ ఢిల్లీకి వెళ్లకుండానే నేరుగా ద్వారక ఎక్స్‌ప్రెస్‌వే చేరుకోవచ్చు. దీంతో రింగ్ రోడ్, ఎయిమ్స్, ఢౌలాకువాన్, ఎన్‌హెచ్-48 వంటి ట్రాఫిక్ ఎక్కువగా ఉండే ప్రాంతాలను పూర్తిగా తప్పించుకోవచ్చు. ప్రారంభోత్సవ కార్యక్రమానికి కేంద్ర రహదారులు, రవాణా మంత్రివర్గ సభ్యుడు నితిన్ గడ్కరీ, ఢిల్లీ ముఖ్యమంత్రి రేఖా గుప్తా, హర్యానా ముఖ్యమంత్రి నయాబ్ సింగ్ సైనీ, అలాగే ఢిల్లీ-ఎన్సీఆర్ ప్రాంతంలోని ఎంపీలు, ఎమ్మెల్యాలు హాజరుకానున్నారు. ఈ కార్యక్రమం ద్వారక ఎక్స్‌ప్రెస్‌వే వద్ద నిర్వహించనున్నారు.