Rave Party: ఫాంహౌస్‌లో రేవ్‌ పార్టీ.. పాల్గొన్న రాజకీయ నాయకులు, రియల్టర్లు
ఈ వార్తాకథనం ఏంటి
హైదరాబాద్‌ పరిసర ప్రాంతమైన మంచాల్‌ మండలం లింగంపల్లి శివారులో ఓ ఫామ్‌హౌస్‌లో నిర్వహించిన రేవ్‌ పార్టీ భారీ కలకలం రేపింది. ఈ వేడుకలో భా.రా.స నాంపల్లి నియోజకవర్గ ఇన్‌ఛార్జి చందపేట ఆనంద్కుమార్గౌడ్, మాజీ మంత్రి ముఖేశ్‌గౌడ్‌ సోదరుడు, గన్‌ఫౌండ్రీ మాజీ కార్పొరేటర్‌ మధుగౌడ్‌తో పాటు రియల్టర్లు, కాంట్రాక్టర్లు, వ్యాపారులు పాల్గొన్నట్లు సమాచారం. బుధవారం అర్ధరాత్రి ఈ పార్టీ జరుగుతున్న సమయంలో రంగారెడ్డి జిల్లా మంచాల్‌ పోలీసులు దాడి చేసి కార్యక్రమాన్ని నిలిపివేశారు. మహిళలను ఇతర రాష్ట్రాల నుంచి తెప్పించి డ్యాన్సులు చేయిస్తూ పాల్గొన్నవారు మద్యం సేవిస్తున్నారని పోలీసులు తెలిపారు. మొత్తం 25 మంది పురుషులు, 8 మంది మహిళలు అక్కడ ఉన్నారు.
వివరాలు
ఇతర రాష్ట్రాల నుండి మహిళలు
పోలీసులు ఘటనా స్థలం నుండి రూ.2.45 లక్షల నగదు, 25 మొబైల్‌ ఫోన్లు, 11 కార్లు, 27 మద్యం సీసాలు, సంగీత పరికరాలు స్వాధీనం చేసుకున్నారు. పోలీసుల వివరాల ప్రకారం.. కాచిగూడకు చెందిన వ్యాపారి రుద్రశెట్టి సప్తగిరి (49) తన ఫామ్‌హౌస్‌లో స్నేహితులతో కలిసి ఈ రేవ్‌ పార్టీని ఏర్పాటు చేసినట్లు పోలీసులు వెల్లడించారు. నృత్యాల కోసం ముంబై, పశ్చిమ బెంగాల్‌, ఆంధ్రప్రదేశ్‌లోని గాజువాక ప్రాంతాల నుండి ఎనిమిది మంది మహిళలను పిలిపించాడు. బుధవారం సాయంత్రం ప్రారంభమైన ఈ పార్టీకి చందపేట ఆనంద్కుమార్గౌడ్ (63), మాజీ కార్పొరేటర్‌ మధుగౌడ్‌ (57)తో పాటు 24 మంది హాజరైనట్లు గుర్తించారు.
వివరాలు
నిందితుల అరెస్టు.. స్టేషన్‌ బెయిలుపై విడుదల
అర్ధరాత్రి సమయంలో భారీ శబ్దాలతో రేవ్‌ పార్టీ జరుగుతున్నట్లు తెలిసి పోలీసులు అక్కడికి చేరుకుని తనిఖీ చేశారు. ఆ సమయంలో పురుషులు మద్యం తాగుతుండగా, మహిళలు నృత్యాలు చేస్తున్నారు. పోలీసుల విచారణలో ప్రతి మహిళా డ్యాన్సర్‌కు రూ.5 వేల ఇచ్చి రప్పించినట్లు తేలింది. మద్యం వినియోగానికి అవసరమైన అనుమతులు లేకుండా పార్టీ నిర్వహించినందున, పాల్గొన్న వారందరినీ పోలీసులు అదుపులోకి తీసుకుని స్టేషన్‌ బెయిల్‌పై విడుదల చేశారు.