Medaram: మేడారానికి మణుగూరు మీదుగా రైలు మార్గం వేయండి.. ఎంపీ ఈటల రాజేందర్ విజ్ఞప్తి
ఈ వార్తాకథనం ఏంటి
సమ్మక్క-సారలమ్మ మహాజాతర జరిగే మేడారానికి మణుగూరు మీదుగా రైలు మార్గాన్ని ఏర్పాటు చేయాలని మల్కాజిగిరి ఎంపీ ఈటల రాజేందర్ కేంద్ర ప్రభుత్వాన్ని కోరారు. బుధవారం పార్లమెంటులో 377 నిబంధన కింద ఈ అంశాన్ని ప్రస్తావించిన ఆయన, మేడారం జాతరకు ఉన్న విశిష్టతను వివరించి, దీనిని జాతీయ పండుగగా గుర్తించాలని కేంద్ర రోడ్లు, రవాణా మంత్రి నితిన్ గడ్కరీకి విజ్ఞప్తి చేశారు.
వివరాలు
15 ఏళ్లుగా లైన్ ప్రతిపాదన..
కొత్తగూడెం భద్రాద్రి జిల్లా మణుగూరు నుంచి గోపాల్‌రావుపేట, తాడ్వాయి (మేడారం), భూపాలపల్లి, మంథని మీదుగా రాఘవపురం వరకు కొత్త రైల్వే లైన్ ప్రతిపాదన గత 15 ఏళ్లుగా పెండింగ్‌లో ఉంది. ఈ మార్గం అమలులోకి వస్తే ఉమ్మడి వరంగల్ జిల్లాలోని పర్యాటక, ఆధ్యాత్మిక క్షేత్రాల అభివృద్ధికి అడ్డుకోలేని పుంజుతలిగా మారుతుంది. అలాగే, సింగరేణిలోని బొగ్గు,అటవీ ఉత్పత్తులను సులభంగా రవాణా చేయడంలో ఈ మార్గం కీలకంగా నిలుస్తుంది. వరంగల్-కాజీపేట రైలు మార్గాలు రాఘవపురం నుంచి మణుగూరు వరకు అనుసంధానం కావడం వల్ల రవాణా మార్గాలు మరింత విస్తృతమవుతాయి. లక్షలాది మంది భక్తుల ఆరాధ్యదైవమైన సమక్క-సారలమ్మ తల్లి కొలువుదీరిన మేడారం, రవాణా సదుపాయాల ద్వారా మరింత సమీపంగా మారుతుంది.
వివరాలు
ఆధ్యాత్మిక వైభవం.. అభివృద్ధి బాటలు..
మణుగూరు నుంచి తాడ్వాయి వరకు రైల్వే మార్గం పెట్టాలంటే దాదాపు 90 శాతం అడవి ప్రాంతం గుండా సాగుతుంది. పచ్చని అడవుల్లో ప్రయాణించే రైలు మార్గం పర్యాటకులను ఆకర్షించనుండగా, మేడారం, బొగత జలపాతం, గోదావరి నది, రామప్ప ఆలయం లాంటి పర్యాటక, ఆధ్యాత్మిక ప్రదేశాలు ఈ మార్గంలో ఉండటం వల్ల ఈకో టూరిజం (Eco-Tourism) అభివృద్ధికి మరింత ఊతమిస్తుంది. మేడారం జాతరకు ఛత్తీస్‌గఢ్, మహారాష్ట్ర, మధ్యప్రదేశ్, ఆంధ్రప్రదేశ్ రాష్ట్రాల నుంచి లక్షలాది భక్తులు తరలివస్తారు. రైలు మార్గం అందుబాటులో ఉంటే భక్తులకు ప్రయాణ సమయం తగ్గడమే కాక, ఖర్చులు కూడా తగ్గుతాయి. ములుగు, భూపాలపల్లి జిల్లాల మధ్య రవాణా వ్యవస్థ బలపడుతుంది.
వివరాలు
భద్రాచలం నుంచి మేడారం వరకు అనుసంధానం
రామగుండం సమీపం నుంచి మరో రైలు మార్గం చెన్నై వైపు వెళ్లడంతో, రామగుండం-వరంగల్-ఖమ్మం మార్గంలో ట్రాఫిక్ ఒత్తిడి తగ్గే అవకాశం ఉంది. సింగరేణి బొగ్గు రవాణా రైళ్లు వరంగల్ మీదుగా వెళ్లకుండానే రామగుండం నుండి నేరుగా విజయవాడకు వెళ్లగలుగుతాయి. అలాగే, విజయవాడ, ఖమ్మం, కొత్తగూడెం ప్రాంతాల భక్తులు వరంగల్ మీదుగా కాకుండా నేరుగా మణుగూరు మీదుగా మేడారానికి వెళ్లే వీలుంటుంది. ఇక భద్రాచలం రామాలయం నుంచి మేడారం వరకు అనుసంధానం ఏర్పడుతుంది.
వివరాలు
అడ్డంకులు తప్పవు..
ఈ రైలు మార్గం ఏర్పాటు విషయంలో అటవీ శాఖ నుంచి భూములను సేకరించడంలో కొన్ని సవాళ్లు ఎదురయ్యే అవకాశం ఉంది. ఇప్పటికే మూడు ప్రత్యామ్నాయ మార్గాలుగా సర్వేలు నిర్వహించారు. వీటిలో ఎటైనా ఒక మార్గానికి కేంద్ర ప్రభుత్వం అనుమతినిచ్చే అవకాశం ఉందని భావిస్తున్నారు.