Revanth Reddy: రైల్వే శాఖ మంత్రితో సీఎం రేవంత్ భేటీ.. రీజనల్ రింగ్ రైలు ప్రాజెక్టు అనుమతులకై విజ్ఞప్తి..
ఈ వార్తాకథనం ఏంటి
కేంద్ర ఐటీ, రైల్వేశాఖ మంత్రి అశ్విని వైష్ణవ్‌తో తెలంగాణ ముఖ్యమంత్రి రేవంత్ రెడ్డి సమావేశమయ్యారు. రాష్ట్రానికి సంబంధించిన అనేక కీలక రైల్వే ప్రాజెక్టుల విషయమై ఈ సమావేశంలో చర్చించారు. నూతన ఆవిష్కరణలకు అనుకూలమైన వాతావరణం, అంతర్జాతీయ ప్రమాణాల పరిశోధన, అభివృద్ధి కేంద్రాలు తెలంగాణలో ఉన్నాయని ఆయన కేంద్ర మంత్రికి వివరించారు. రంగారెడ్డి జిల్లా ముచ్చెర్లలో హైటెక్ ఎలక్ట్రానిక్స్ పార్క్ ఏర్పాటుకు 'ఈఎంసీ 2.0' పథకం కింద తెలంగాణ రాష్ట్ర ప్రభుత్వం పంపిన ప్రతిపాదనను కేంద్ర మంత్రికి తెలియజేశారు. రీజినల్ రింగు రోడ్డుకు సమీపంలో నూతన ఎలక్ట్రానిక్ మాన్యుఫ్యాక్చరింగ్ పార్క్ నిర్మించాలని ఆయన కోరారు. రీజినల్ రింగు రైలుకు వెంటనే అనుమతి మంజూరు చేయాలంటూ రేవంత్ రెడ్డి అభ్యర్థించారు.
వివరాలు
రీజినల్ రింగు రైలు ప్రాజెక్టు ప్రతిపాదన
రాష్ట్రంలో రైల్వే అనుసంధానాన్ని మరింత విస్తరించేందుకు కొత్త రైల్వే ప్రాజెక్టులకు అనుమతులు ఇవ్వాలని సీఎం రేవంత్ రెడ్డి కేంద్ర మంత్రిని కోరారు. హైదరాబాద్ రీజినల్ రింగు రోడ్డుకు అనుసంధానంగా రీజినల్ రింగు రైలు ప్రాజెక్టును ప్రతిపాదించినట్లు, దీనికి రైల్వే బోర్డు ఇప్పటికే ఫైనల్ లొకేషన్ సర్వేకు అనుమతి ఇచ్చినట్లు ఆయన తెలిపారు. రూ.8 వేల కోట్ల వ్యయంతో రూపొందుతున్న ఈ ప్రాజెక్టుకు త్వరగా అనుమతి మంజూరు చేయాలని కోరారు. రీజినల్ రింగు రైలు ప్రాజెక్టు ద్వారా గ్రామీణ ప్రాంతాలు, పట్టణాల మధ్య అనుసంధానం మెరుగుపడుతుందని, హైదరాబాద్ నగరంలోని ప్రధాన రైల్వే స్టేషన్లలో ట్రాఫిక్ భారం తగ్గుతుందని రేవంత్ రెడ్డి వివరించారు.
వివరాలు
హైదరాబాదులోని డ్రైపోర్ట్‌ను సమీపంలోని ఓడరేవుతో అనుసంధానించే రైలు మార్గం
ఖాజీపేట రైల్వే డివిజన్ ఏర్పాటు విషయాన్ని ప్రత్యేకంగా ప్రస్తావించిన సీఎం రేవంత్ రెడ్డి, తెలంగాణ రాష్ట్రంలో రైల్వే కార్యకలాపాలను సమర్థవంతంగా నిర్వహించేందుకు ఇది అవసరమని చెప్పారు. ప్రయాణికుల భద్రత, వేగవంతమైన రవాణా సేవలు అందించేందుకు ఖాజీపేట రైల్వే డివిజన్ ఏర్పాటు చేయాలని ఆయన కోరారు. అలాగే, హైదరాబాదులోని డ్రైపోర్ట్‌ను సమీపంలోని ఓడరేవుతో అనుసంధానించే రైల్వే మార్గాన్ని మంజూరు చేయాలని కోరారు. ఈ మార్గం ఔషధాలు, ఎలక్ట్రానిక్ పరికరాలు, ఫుడ్ ప్రాసెసింగ్ ఉత్పత్తుల ఎగుమతులు, దిగుమతులకు దోహదం చేస్తుందని వివరించారు. రాష్ట్రంలోని వెనుకబడిన ప్రాంతాల అభివృద్ధి, పారిశ్రామిక మరియు వ్యవసాయ ఉత్పత్తుల రవాణా సౌకర్యాల కల్పన కోసం పలు కొత్త రైలు మార్గాలకు సంబంధించిన ప్రతిపాదనలు కేంద్ర మంత్రికి సమర్పించినట్లు తెలిపారు.
వివరాలు
సీఎం అభ్యర్థనలకు కేంద్ర మంత్రి సానుకూలం
వికారాబాద్ - కృష్ణా (122 కి.మీ., రూ.2,677 కోట్ల అంచనా వ్యయం), కల్వకుర్తి - మాచర్ల (100 కి.మీ., రూ.2,000 కోట్ల అంచనా వ్యయం), డోర్నకల్ - గద్వాల (296 కి.మీ., రూ.6,512 కోట్ల అంచనా వ్యయం), డోర్నకల్ - మిర్యాలగూడ (97 కి.మీ., రూ.2,184 కోట్ల అంచనా వ్యయం) మార్గాలను వందశాతం రైల్వేశాఖ వ్యయంతో మంజూరు చేయాలని సీఎం రేవంత్ రెడ్డి విజ్ఞప్తి చేశారు. సీఎం అభ్యర్థనలకు కేంద్ర మంత్రి సానుకూలంగా స్పందించినట్లు ప్రభుత్వం విడుదల చేసిన ప్రకటనలో వెల్లడైంది. ఇందువల్ల రాబోయే రోజుల్లో రాష్ట్రంలోని వివిధ జిల్లాలకు రైల్వే అనుసంధానం మరింత మెరుగవుతుందని భావిస్తున్నారు.