GIS Electricity: రాష్ట్రంలో తొలి జీఐఎస్ విద్యుత్తు ఉప కేంద్ర నిర్మాణం.. నేడు ప్రారంభించనున్న సీఎం చంద్రబాబు
అమరావతిలో నాణ్యమైన విద్యుత్తు సరఫరా నిరంతరంగా కొనసాగించేందుకు నిర్మించిన 400/220 కేవీ గ్యాస్ ఇన్సులేటెడ్ సబ్‌స్టేషన్ (జీఐఎస్) ప్రారంభోత్సవానికి సిద్ధమైంది. ఈ కేంద్రాన్ని ఆంధ్రప్రదేశ్ ట్రాన్స్‌మిషన్ కార్పొరేషన్ రాజధాని ప్రాంతంలోని తాళ్లాయపాలెంలో నిర్మించింది, ఇది రాష్ట్రంలో మొట్టమొదటి సారి జరుగుతోంది. గురువారం ముఖ్యమంత్రి చంద్రబాబు నాయుడు దీన్ని ప్రారంభించనున్నారు. ప్రస్తుతం రాజధాని ప్రాంతానికి తాడికొండలోని 220/132/33 కేవీ కేంద్రం నుంచి విద్యుత్తు సరఫరా అందుతుంది. అమరావతి అభివృద్ధిలో ఉన్నందున భవిష్యత్తులో విద్యుత్తు డిమాండ్ పెరుగుతుందనే దృష్ట్యా ఇప్పటినుంచే సరఫరా అవసరాలకు ప్రణాళిక రూపొందిస్తున్నారు.
రాజధాని ప్రాంతానికి నిరంతరంగా విద్యుత్తు సరఫరా
తాళ్లాయపాలెం వద్ద ఏర్పాటు చేసిన 400/220 కేవీ విద్యుత్తు కేంద్రం పక్కనే 220/33 కేవీ విద్యుత్తు కేంద్రం నిర్మాణం చేపట్టనున్నారు. ఈ కేంద్రం నుంచి నేలపాడులో ఏర్పాటు చేయబోయే 220/33 కేవీ విద్యుత్తు కేంద్రానికి సరఫరా చేస్తారు. తాడేపల్లిలోని 132కేవీ కేంద్రాన్ని 220కేవీగా అప్‌గ్రేడ్ చేసి తాళ్లాయపాలెం జీఐఎస్ నుంచి విద్యుత్తు అందిస్తారు. దీని ద్వారా రాజధాని ప్రాంతానికి నిరంతరంగా విద్యుత్తు సరఫరా నిర్వహిస్తారు. తాడికొండ విద్యుత్తు కేంద్రానికి ప్రత్యామ్నాయంగా ఇది ఉపయోగపడుతుంది. ఇలా తాడికొండ, తాళ్లాయపాలెం 220/33 కేవీ విద్యుత్తు కేంద్రాల ద్వారా రాజధాని ప్రాంతంలో ఎటువంటి అంతరాయం లేకుండా విద్యుత్తు సరఫరా జరగడం సులభం అవుతుంది. తుళ్లూరు,మంగళగిరి,తాడేపల్లి మండలాలు,గుంటూరు,ఎన్టీఆర్ జిల్లాలతో పాటు పరిశ్రమలకు కూడా నిరంతర విద్యుత్తు సరఫరా అందించబడుతుంది.
