Budget 2024: పార్లమెంట్ వర్షాకాల సమావేశాలు జూలై 22న ప్రారంభం.. బడ్జెట్‌ను ప్రవేశపెట్టనున్న ఆర్థిక మంత్రి
పార్లమెంట్ వర్షాకాల సమావేశాల తేదీ దాదాపు ఖరారైంది. మోదీ ప్రభుత్వం 3.0 వర్షాకాల సమావేశాలు జూలై 22 నుండి ఆగస్టు 9 వరకు జరుగుతాయని వర్గాలు చెబుతున్నాయి. వర్షాకాల సమావేశాల మొదటి రోజు జూలై 22న ఆర్థిక మంత్రి నిర్మలా సీతారామన్ మోదీ ప్రభుత్వం 3.0 బడ్జెట్‌ను సమర్పించే అవకాశం ఉంది. అయితే బడ్జెట్ తేదీకి సంబంధించి ప్రభుత్వం నుంచి అధికారికంగా ఎలాంటి ప్రకటన వెలువడలేదు. ఆర్థిక మంత్రి నిర్మలా సీతారామన్ జూన్ 12న వరుసగా మూడోసారి బాధ్యతలు స్వీకరించారు.
ఫిబ్రవరిలో మధ్యంతర బడ్జెట్‌ను ప్రవేశపెట్టారు
రానున్న కాలంలో నిర్మలా సీతారామన్ కూడా సరికొత్త రికార్డు సృష్టించనున్నారు.వరుసగా ఏడవ బడ్జెట్,వరుసగా ఆరవ పూర్తి బడ్జెట్‌ను సమర్పించే దేశానికి ఆమె మొదటి ఆర్థిక మంత్రి అవుతారు. ఇప్పటి వరకు ఆమె 5 పూర్తి బడ్జెట్‌లు,1 మధ్యంతర బడ్జెట్‌ను సమర్పించారు. అంతకుముందు ఫిబ్రవరిలో ఆమె మధ్యంతర బడ్జెట్‌ను ప్రవేశపెట్టారు. 2025-2026 నాటికి ఆర్థిక లోటు 5.1%గా ఉంటుందని అంచనా వేస్తున్నట్లు ఆర్థిక మంత్రి తెలిపారు. 44.90 లక్షల కోట్ల వ్యయం కాగా, ఆదాయం రూ. 30 లక్షల కోట్లు.
జూన్ 24 నుంచి పార్లమెంట్ తొలి సమావేశాలు
2024-25 ఆర్థిక సంవత్సరానికి సంబంధించిన పూర్తి బడ్జెట్‌ను వచ్చే నెలలో కొత్తగా ఏర్పాటు చేసిన 18వ లోక్‌సభలో ప్రవేశపెట్టనున్నారు. 18వ లోక్‌సభ తొలి సెషన్‌ జూన్ 24న ప్రారంభమై జూలై 3న ముగుస్తుందని కొత్త కేంద్ర పార్లమెంటరీ వ్యవహారాల మంత్రి కిరణ్‌ రిజిజు బుధవారం తెలిపారు. 9 రోజుల ప్రత్యేక సెషన్‌లో, లోక్‌సభ స్పీకర్‌ను ఎన్నుకుంటారు. కొత్త పార్లమెంటు సభ్యులు (MP) ప్రమాణ స్వీకారం చేస్తారు. ఇదిలా ఉండగా, రాజ్యసభ 264వ సమావేశాలు జూన్ 27 నుండి జూలై 3, 2024 వరకు జరుగుతాయి. లోక్‌సభ ఎన్నికల తర్వాత ఇదే తొలి పార్లమెంట్ సమావేశాలు. జూన్ 27న రాష్ట్రపతి ద్రౌపది ముర్ము ఉభయ సభల సంయుక్త సమావేశంలో ప్రసంగిస్తారు.
వచ్చే ఐదేళ్ల కోసం కొత్త ప్రభుత్వ రోడ్‌మ్యాప్‌
వచ్చే ఐదేళ్ల కోసం కొత్త ప్రభుత్వ రోడ్‌మ్యాప్‌ను ఆమె సమర్పించనున్నారు. రాష్ట్రపతి ప్రసంగం అనంతరం ప్రధాని నరేంద్ర మోదీ తన మంత్రి మండలిని పార్లమెంట్‌లో ప్రవేశపెట్టనున్నారు. సమావేశాల తొలి మూడు రోజుల్లో కొత్తగా ఎన్నికైన ఎంపీలు ప్రమాణం చేసి లోక్‌సభ స్పీకర్‌ను ఎన్నుకుంటారు. ఆ తర్వాత వర్షాకాల సమావేశాలు రానుండగా, పూర్తిస్థాయి బడ్జెట్‌ను ప్రవేశపెట్టేందుకు సన్నాహాలు చేస్తున్నారు.
