Neuralink: ఎలాన్ మస్క్ న్యూరాలింక్ చిప్‌కు ధన్యవాదాలు తెలిపిన తొలి బ్రెయిన్ చిప్ యూజర్
ఈ వార్తాకథనం ఏంటి
పక్షవాతానికి గురైన ఎనిమిది సంవత్సరాల తర్వాత, 2024 జనవరిలో, 30 ఏళ్ల నోలాండ్ అర్బాగ్‌కు అమెరికాకు చెందిన న్యూరోటెక్నాలజీ సంస్థ న్యూరాలింక్ మెదడులో ప్రత్యేకమైన పరికరాన్ని అమర్చింది.
ప్రస్తుతం, అతను వేగంగా కోలుకుంటున్నాడు. ఇటీవల అర్బాగ్ తన అనుభవాన్నిపంచుకుంటూ, ప్రస్తుతం మునుపటి కంటే ఎంతో ఆనందంగా ఉన్నానని వెల్లడించాడు.
ఈ అవకాశాన్ని ఇచ్చినందుకు ఎలాన్ మస్క్‌కు ప్రత్యేకంగా ధన్యవాదాలు తెలిపాడు.
తన ఆలోచనల ద్వారా కంప్యూటర్‌ను నియంత్రించగలుగుతున్నట్లు పేర్కొన్నాడు.
చిప్ అమర్చే ముందు తన పరిస్థితి చాలా దారుణంగా ఉండేదని, అన్ని విషయాల్లో ఇతరులపై ఆధారపడాల్సి వచ్చేదని అర్బాగ్ వివరించాడు.
కానీ ఇప్పుడు న్యూరాలింక్ టెక్నాలజీ వల్ల తన మెదడు మరింత మెరుగుపడి, చదువుతో పాటు వీడియో గేమ్‌లు కూడా ఆడగలుగుతున్నట్లు వెల్లడించాడు.
వివరాలు
ఎలాన్ మస్క్ - న్యూరాలింక్ సృష్టికర్త
న్యూరాలింక్ అనేది ఎలాన్ మస్క్ స్థాపించిన అత్యాధునిక న్యూరోటెక్నాలజీ సంస్థ.
మెదడు-కంప్యూటర్ ఇంటర్‌ఫేస్‌లను అభివృద్ధి చేయడం దీని ముఖ్య లక్ష్యం. ముఖ్యంగా, పక్షవాతం వంటి తీవ్రమైన అనారోగ్య సమస్యలతో బాధపడుతున్నవారికి సహాయపడేందుకు ఈ టెక్నాలజీ రూపొందించబడింది.
ఈ పరికరాన్ని ఉపయోగించి, మెదడుతో నేరుగా కంప్యూటర్‌ను నియంత్రించడం, ఇతర బాహ్య పరికరాలను నడిపే సామర్థ్యాన్ని పొందడం సాధ్యమవుతుంది.
న్యూరాలింక్ పరికరం మెదడులోని నాడీ సంకేతాలను రికార్డు చేసి, అవి ఎలా పనిచేస్తున్నాయో అర్థం చేసుకుని, అవసరమైన సమాచారాన్ని కంప్యూటర్లకు అందిస్తుంది.
ప్రస్తుతం ఈ చిప్‌ను అమర్చించుకున్న తొలి వ్యక్తి, కేవలం తన ఆలోచనలతోనే కంప్యూటర్‌ను నియంత్రించగలుగుతున్నాడు.
ఈ టెక్నాలజీ భవిష్యత్తులో మరెంతో మందికి ఆశాజనకంగా మారనుంది.