IPL 2026, RCB vs GT: కోహ్లీ vs రబాడా.. మళ్లీ హై వోల్టేజ్ ఫైట్
ఈ వార్తాకథనం ఏంటి
ఐపీఎల్ 2026లో భాగంగా మరో ఆసక్తికరమైన మ్యాచ్కు రంగం సిద్ధమైంది. మ్యాచ్ నంబర్ 34లో రాయల్ చాలెంజెర్స్ బెంగళూరు జట్టు, గుజరాత్ టైటాన్స్ను ఎదుర్కోనుంది. ఈ పోరు శుక్రవారం బెంగళూరులోని ఎం.చిన్నస్వామి స్టేడియంలో జరగనుంది. గత మ్యాచ్లో ఢిల్లీ క్యాపిటల్స్పై ఆర్సీబీ నిరాశపరిచిన ప్రదర్శన చేసింది. అదే సమయంలో గుజరాత్ టైటాన్స్, ముంబయి ఇండియన్స్ చేతిలో 99 పరుగుల తేడాతో భారీ ఓటమి పాలైంది. ఈ నేపథ్యంలో ఇరు జట్లు తిరిగి బలంగా నిలబడాలని చూస్తున్నాయి. ఈ మ్యాచ్లో ఆసక్తికరమైన కొన్ని కీలక ప్లేయర్ మ్యాచ్అప్స్పై అందరి దృష్టి ఉంది.
వివరాలు
వాళ్లిద్దరి మధ్యే పోటీ..
అందరూ ఎదురుచూస్తున్న పోరు విరాట్ కోహ్లీ , కజిసో రబాడ మధ్య జరగనుంది. ఈ ఇద్దరూ గతంలో టెస్ట్ క్రికెట్లో ఎన్నో సార్లు తలపడిన సంగతి తెలిసిందే. అయితే టీ20 ఫార్మాట్లో కూడా వీరి పోటీ అంతే ఆసక్తికరంగా ఉంటుంది. గణాంకాల ప్రకారం రబాడా, కోహ్లీని 14 టీ20 ఇన్నింగ్స్లో నాలుగు సార్లు ఔట్ చేశాడు. ఈ సమయంలో కోహ్లీ స్ట్రైక్రేట్ 113.33గా ఉంది. కాబట్టి ఈ పోరు మ్యాచ్లో కీలకంగా మారే అవకాశం ఉంది. ఇక గుజరాత్ టైటాన్స్ కెప్టెన్ శుభమన్ గిల్, ఆస్ట్రేలియా ఫాస్ట్ బౌలర్ జోష్ హేజిల్వుడ్ ను ఎదుర్కోనున్నారు. ఈ ఇద్దరి మధ్య కూడా ఆసక్తికరమైన పోటీ ఉంది. ముఖ్యంగా హాజిల్వుడ్, గిల్పై ఆధిపత్యం చాటుతున్నాడు.
వివరాలు
భువనేశ్వర్ vs జాస్ బట్లర్..
ఇప్పటివరకు గిల్, హాజిల్వుడ్ బౌలింగ్లో 30 బంతుల్లో కేవలం 25 పరుగులు మాత్రమే చేశాడు. స్ట్రైక్రేట్ 83.33గా ఉంది. అంతేకాకుండా ఆరు టీ20 ఇన్నింగ్స్లో రెండుసార్లు ఔట్ అయ్యాడు. గిల్ నుంచి హాజిల్వుడ్పై కేవలం మూడు బౌండరీలు మాత్రమే నమోదయ్యాయి. మరోవైపు టీ20ల్లో అత్యంత ఏకపక్ష పోటీలలో ఒకటిగా చెప్పుకునే పోరు భువనేశ్వర్ కుమార్ , జాస్ బట్లర్ మధ్య ఉండేది. భువనేశ్వర్ కుమార్ తన ఇన్స్వింగ్ బంతులతో బట్లర్ను పదేపదే ఇబ్బంది పెట్టాడు. ఈ ఫార్మాట్లో 18 ఇన్నింగ్స్లో బట్లర్ను ఏడు సార్లు ఔట్ చేశాడు. ఈ పోరులో బట్లర్ స్ట్రైక్రేట్ 110.41గా మాత్రమే ఉంది. అలాగే ఈ మ్యాచ్అప్లో మొత్తం 48 డాట్ బాల్స్ నమోదవడం కూడా గమనార్హం.