IPL 2027 Retention: ఐపీఎల్ 2027...రిటెన్షన్ల కోసమే వెయ్యికోట్లు ఖర్చు
ఈ వార్తాకథనం ఏంటి
ఐపీఎల్ 2027 సీజన్ కోసం రిటెన్షన్ ప్రక్రియ పూర్తవడంతో ఇప్పుడు అందరి చూపూ మినీ వేలంపైనే ఉంది. పది ఫ్రాంచైజీలు కలిసి ఆటగాళ్లను అట్టిపెట్టుకోవడానికి ఏకంగా రూ.1,002.05 కోట్లు ఖర్చు చేశాయి. దీంతో డిసెంబర్ 16న గోవాలో జరగనున్న వేలానికి అన్ని జట్ల దగ్గర కలిపి రూ.297.95 కోట్లు మాత్రమే మిగిలాయి. మొత్తం 66 ఖాళీలను భర్తీ చేయాల్సి ఉండగా, అందులో 25 స్థానాలు విదేశీ ఆటగాళ్ల కోసం ఉన్నాయి. అంటే వేలంలో ఒక్కో జట్టు నిర్ణయాలు చాలా కీలకంగా మారనున్నాయి.
Details
షమీ, హర్షల్ పటేల్ ట్రేడ్స్తో మారిన లెక్కలు
రిటెన్షన్లతో పాటు ట్రేడింగ్ విండోలోనూ కీలక మార్పులు చోటుచేసుకున్నాయి.
లఖ్నవూ సూపర్ జెయింట్స్ మహమ్మద్ షమీ, మణిమారన్ సిద్ధార్థ్లను రాజస్థాన్ రాయల్స్కు పంపి, అక్కడి నుంచి శామ్ కరన్ను తీసుకుంది.
మరోవైపు రెండుసార్లు పర్పుల్ క్యాప్ గెలిచిన హర్షల్ పటేల్ సన్రైజర్స్ హైదరాబాద్ నుంచి గుజరాత్ టైటాన్స్కు మారాడు.
గుజరాత్ అత్యధికంగా 22 మంది ఆటగాళ్లను రిటైన్ చేసుకోగా, చెన్నై, పంజాబ్, రాజస్థాన్ 19 మంది చొప్పున నిలుపుకున్నాయి.
Details
లఖ్నవూ చేతిలో అత్యధిక డబ్బు
మినీ వేలానికి ముందు అత్యధిక పర్స్ ఉన్న జట్టుగా లఖ్నవూ సూపర్ జెయింట్స్ నిలిచింది.
18 మంది ఆటగాళ్లను కొనసాగించిన ఆ జట్టు దగ్గర రూ.47.45 కోట్లు ఉన్నాయి. కోల్కతా నైట్రైడర్స్ వద్ద రూ.41.65 కోట్లు, సన్రైజర్స్ హైదరాబాద్ వద్ద రూ.40.15 కోట్లు, దిల్లీ క్యాపిటల్స్ వద్ద రూ.39.50 కోట్లు అందుబాటులో ఉన్నాయి.
మరోవైపు గుజరాత్ టైటాన్స్ వద్ద కేవలం రూ.8.75 కోట్లు మాత్రమే మిగిలాయి. ఆ జట్టుకు ఇంకా మూడు స్థానాలు భర్తీ చేయాల్సి ఉంది.
Details
స్టార్ ఆటగాళ్లతో బలమైన కోర్
చెన్నై సూపర్ కింగ్స్ రుతురాజ్ గైక్వాడ్, సంజూ శాంసన్, శివమ్ దూబె, సర్ఫరాజ్ ఖాన్లతో పాటు లియామ్ లివింగ్స్టోన్, డెవాల్డ్ బ్రెవిస్ వంటి విదేశీ ఆటగాళ్లను కొనసాగించింది.
ముంబయి ఇండియన్స్ రోహిత్ శర్మ, సూర్యకుమార్ యాదవ్, జస్ప్రీత్ బుమ్రా, తిలక్ వర్మ, అర్ష్దీప్ సింగ్లపై నమ్మకం ఉంచింది.
ఆర్సీబీ విరాట్ కోహ్లీ, రజత్ పాటిదార్, భువనేశ్వర్ కుమార్, ఫిల్ సాల్ట్లను అట్టిపెట్టుకుంది. సన్రైజర్స్ కమిన్స్, క్లాసెన్, ఇషాన్ కిషన్, నితీశ్ కుమార్ రెడ్డి, అభిషేక్ శర్మల కోర్ను కొనసాగించింది.
Details
డిసెంబర్ 16న అసలు పోరు
ఇప్పటికే రిటెన్షన్ల కోసం భారీ మొత్తాలు ఖర్చయిపోవడంతో మినీ వేలంలో మిగిలిన డబ్బుతోనే జట్లు తమ అవసరాలను తీర్చుకోవాల్సి ఉంది.
ముఖ్యంగా తక్కువ పర్స్ ఉన్న జట్లు వ్యూహాత్మకంగా అడుగులు వేయాల్సి ఉంటుంది.
మరోవైపు లఖ్నవూ, కేకేఆర్, సన్రైజర్స్, దిల్లీ వంటి జట్ల దగ్గర పెద్ద మొత్తాలు ఉండటంతో కీలక ఆటగాళ్ల కోసం పోటీ పెరిగే అవకాశం ఉంది.
డిసెంబర్ 16న గోవాలో జరిగే వేలంలో ఈ లెక్కలన్నీ ఎలా మారతాయో చూడాలి.