BCCI: 'నచ్చిన మ్యాచ్‌లను మాత్రమే ఆడతామంటే ఒప్పుకొం'.. ఆటగాళ్ళకి బీసీసీఐ స్ట్రాంగ్ వార్నింగ్..
ఈ వార్తాకథనం ఏంటి
భారత క్రికెటర్లు తాము ఇష్టపడే మ్యాచ్‌లకే పరిమితం కావడం ఇక నుంచి సాధ్యం కాదని బీసీసీఐ తేల్చి చెప్పింది. ఇటీవల కొంతమంది ఆటగాళ్లు దేశవాళీ టోర్నీలు, వన్డేలు లాంటి తక్కువ ప్రజాదరణ కలిగిన మ్యాచ్‌లను దూరంగా ఉంచుతూ, ఐపీఎల్‌, వరల్డ్ కప్‌లాంటి పెద్ద టోర్నీల్లో మాత్రమే పాల్గొనడం కనిపించింది. ఈ పరిస్థితిపై బోర్డు అసంతృప్తిగా ఉంది. ఈ నేపథ్యంలో టెస్టులు, వన్డేలు, టీ20లు అన్నీ ఆడే క్రికెటర్లు అన్ని ఫార్మాట్లకూ సిద్ధంగా ఉండాలని, అంతేగానీ, వారికి నచ్చిన మ్యాచుల్లోనే ఆడే అవకాశం ఇకపై ఉండదని తెలిపింది.
వివరాలు
ఆటగాళ్లకు త్వరలోనే ఈ మేరకు బీసీసీఐ అధికారికంగా మెసేజ్
బీసీసీఐ వర్గాల సమాచారం ప్రకారం, ఈ విషయంపై ఇప్పటికే చర్చలు పూర్తయ్యాయి. త్వరలోనే అన్ని ఫార్మాట్లలో ఆడే కేంద్ర ఒప్పందం కలిగిన ఆటగాళ్లకు ఈ సందేశాన్ని అధికారికంగా బోర్డు పంపనుంది. ఇకపై వారు ఇష్టం వచ్చిన మ్యాచులే ఆడే విధానాన్ని మేము సహించబోమని, స్పష్టమైన మార్గదర్శకాలు రూపొందించబోతున్నామని తెలిపారు. ఈ అంశంపై బీసీసీఐకి చెందిన ఓ సీనియర్ అధికారి మీడియాతో మాట్లాడుతూ.."ఇప్పటికే దీనిపై అంతర్గతంగా చర్చించాం. కేంద్ర ఒప్పందంలో ఉన్న ఆటగాళ్లు, ముఖ్యంగా అన్ని ఫార్మాట్లకు అందుబాటులో ఉండేవారు ఇకపై ఏ ఫార్మాట్‌ను విస్మరించాలనుకుంటే ముందు అనుమతి తీసుకోవాల్సి ఉంటుంది. ఆటగాళ్లు తమకు నచ్చిన మ్యాచులే ఎంచుకోవడం ఆమోదయోగ్యం కాదు" అని వ్యాఖ్యానించారు.
వివరాలు
బౌలర్ల వర్క్‌లోడ్ మేనేజ్‌మెంట్‌పై మాత్రం కూల్‌గా..
అయితే, ఆటగాళ్లు అన్ని ఫార్మాట్లలో పాల్గొనాలని కోరుతున్న బీసీసీఐ, వర్క్‌లోడ్ మేనేజ్‌మెంట్ విషయంలో మాత్రం కొంత సౌకర్యాన్ని ఇస్తోంది. ప్రత్యేకంగా ఫాస్ట్ బౌలర్ల విషయంలో గాయాల నివారణకు అవసరమైన విశ్రాంతిని మంజూరు చేయడానికి బోర్డు సిద్ధంగా ఉంది. ఇది గతంలో లాగే కొనసాగుతుందన్న అభిప్రాయాన్ని బోర్డు వెల్లడించింది. అయితే వర్క్‌లోడ్ మేనేజ్‌మెంట్‌ను పారదర్శకంగా, నిష్పక్షపాతంగా నిర్వహించాల్సిన అవసరం ఉందని బోర్డు స్పష్టం చేసింది. ముఖ్యంగా ఫాస్ట్ బౌలర్లు ఎక్కువగా గాయాల బారిన పడే అవకాశమున్నందున, వారిపై ప్రత్యేక శ్రద్ధ అవసరమని పేర్కొంది. అయితే ఈ వ్యవస్థను దుర్వినియోగం చేసి, కీలక మ్యాచ్‌లను మిస్ కావడాన్ని మాత్రం ఒప్పుకోబోమని బీసీసీఐ అధికార ప్రతినిధి వెల్లడించారు.
వివరాలు
ఆసక్తికరంగా బోర్డు నిర్ణయాలు
అంతేకాక, ఆసియా కప్ టోర్నీలో జస్ప్రీత్ బుమ్రా అందుబాటులో ఉంటాడా? అన్నదానిపై చర్చ జరుగుతోంది. మరోవైపు, మహ్మద్ సిరాజ్ ఇటీవల ఇంగ్లండ్‌తో జరిగిన ఐదు టెస్టులు ఆడాడు. అతని విషయంలో వర్క్‌లోడ్ మేనేజ్‌మెంట్ వర్తించే అవకాశం ఉన్నప్పటికీ, ఆసియా కప్‌కు తిరిగి వస్తాడా? లేదా? అన్నది ఇంకా స్పష్టంగా తెలియాల్సి ఉంది. ఇక కెప్టెన్ రోహిత్ శర్మ విషయానికి వస్తే - అతను ఇప్పటికే టెస్టులు, టీ20ల నుంచి రిటైర్మెంట్ ప్రకటించినా, వన్డేలు,ఐపీఎల్‌లో తన ప్రయాణాన్ని కొనసాగిస్తున్నాడు. ఈ పరిణామాల నేపథ్యంలో బోర్డు తీసుకుంటున్న నిర్ణయాలు ఆసక్తికరంగా మారాయి.