Rohit Sharma: ఫిట్‌నెస్ నిరూపించుకోవడానికి బ్రాంకో టెస్టుకు సిద్ధమైన రోహిత్ శర్మ
ఈ వార్తాకథనం ఏంటి
టీమిండియా వన్డే జట్టు కెప్టెన్ రోహిత్ శర్మ ఈ నెల 13న బీసీసీఐ సెంటర్ ఆఫ్ ఎక్స్‌లెన్స్‌ (సీఓఈ)కు వెళ్లనున్నారు. బెంగళూరులో ఉన్న ఈ సీఓఈలో అతనికి ఫిట్‌నెస్ సంబంధిత పరిక్షలు జరగనున్నాయి. మే చివర్లో ఐపీఎల్‌లో చివరి మ్యాచ్ ఆడిన తర్వాత రోహిత్ మళ్లీ మైదానంలో కనిపించలేదు. టెస్టుల నుంచి రిటైరవడంతో అతను ఖాళీగా ఉన్నాడు. రోహిత్ గత ఏడాదే టీ20లకు గుడ్‌బై చెప్పిన సంగతి తెలిసిందే. ఇప్పుడు రాబోయే అక్టోబరులో ఆస్ట్రేలియాలో జరగబోయే వన్డే సిరీస్‌కి ముందుగా రోహిత్ తన ఫిట్‌నెస్‌ను పరీక్షించుకోవడానికి ముందుగానే హాజరు కానున్నాడు. గతంలో టీమిండియా ఆటగాళ్ల శారీరక సామర్థ్యాన్ని అంచనా వేసేందుకు బీసీసీఐ యోయో టెస్టును నిర్వహించేది.
వివరాలు
ఊపిరితిత్తులు పాడైపోతాయి: ఏబీ డివిలియర్స్
అయితే తాజాగా బోర్డు కొత్తగా బ్రాంకో టెస్టును ప్రవేశపెట్టింది. నిపుణుల అభిప్రాయం ప్రకారం ఈ బ్రాంకో పరీక్ష, యోయో టెస్టుతో పోలిస్తే మరింత కఠినమైనదిగా భావిస్తున్నారు. బీసీసీఐ కొత్తగా తీసుకొచ్చిన ఈ బ్రాంకో ఫిట్‌నెస్ టెస్టు అంతగా ఉపయోగకరం కాదని దక్షిణాఫ్రికా మాజీ స్టార్ బ్యాట్స్‌మన్ ఏబీ డివిలియర్స్ అభిప్రాయపడ్డాడు. "ఆ పరీక్ష గురించి తొలిసారి విన్నప్పుడు అది ఎంత కఠినంగా ఉండబోతుందో అర్థమైంది. నిజంగా అంత అర్ధంలేని పరీక్ష ఇంకోటి ఉండదు. ప్రిటోరియా యూనివర్సిటీలో నేను ఆ టెస్టులో పాల్గొన్న రోజును ఇప్పటికీ గుర్తు పెట్టుకున్నాను. పెద్దగా ఆక్సిజన్‌ లేని ఎత్తయిన ప్రదేశంలో పరుగెడుతుంటే ఊపిరితిత్తులు పాడైపోతాయనిపించింది'' అని ఏబీ అన్నాడు.