Elon Musk: ట్రంప్‌కు ఎలాన్ మస్క్ భారీ షాక్.. బిల్లు పాసైతే 'అమెరికన్ పార్టీ' ఏర్పాటు చేస్తానని హెచ్చరిక
ఈ వార్తాకథనం ఏంటి
అమెరికా రాజకీయాల్లో తీవ్ర కలకలం రేగింది. టెస్లా, స్పేస్‌ఎక్స్‌ వంటి దిగ్గజ సంస్థల అధినేత ఎలాన్ మస్క్, అధ్యక్షుడు డొనాల్డ్ ట్రంప్ ప్రతిష్టాత్మకంగా తీసుకువచ్చిన భారీ పన్ను, వలసల బిల్లుపై బహిరంగంగా యుద్ధం ప్రకటించారు. దేశ భవిష్యత్తుకు ఇది అత్యంత ప్రమాదకరమని వ్యాఖ్యానించిన మస్క్, ఈ బిల్లుకు మద్దతిచ్చే పార్లమెంటరీ సభ్యులను వచ్చే ఎన్నికల్లో ఓడించేందుకు తాను కట్టుబడి ఉన్నట్లుప్రకటించారు. అంతటితో ఆగకుండా, ఈ బిల్లు సెనేట్‌లో ఆమోదం పొందితే, తాను కొత్త రాజకీయ పార్టీని స్థాపించేందుకు సిద్ధంగా ఉన్నట్టు బహిరంగంగా ప్రకటించారు.
వివరాలు
ట్రంప్ బిల్లులో ఏముంది?
'వన్ బిగ్ బ్యూటిఫుల్ బిల్' పేరుతో ట్రంప్ ఈ బిల్లును తీసుకొచ్చారు. ఇందులో 4.5 ట్రిలియన్ డాలర్ల విలువైన ప్యాకేజీ ఉండగా, అతని మొదటి పదవీకాలంలో అమలైన పన్ను తగ్గింపులను కొనసాగించడంతో పాటు, రక్షణ రంగానికి భారీగా నిధులు కేటాయించడం, వలసదారులపై మరింత కఠిన చర్యలు తీసుకునేందుకు నిధులు కేటాయించడం వంటి అంశాలు ఉన్నాయి. అయితే, ఈ బిల్లుతో జాతీయ అప్పు వచ్చే పదేళ్లలో 3.3 ట్రిలియన్ డాలర్లకు పెరిగే ప్రమాదం ఉందని, దాని ప్రభావంతో పేద, మధ్యతరగతి అమెరికన్ల ఆరోగ్య బీమా సబ్సిడీలపై సుమారు 1 ట్రిలియన్ డాలర్ల మేర కోతలు పడనున్నట్లు తీవ్ర విమర్శలు వెల్లువెత్తుతున్నాయి.
వివరాలు
ఎలాన్ మస్క్ తీవ్రంగా మండిపాటు
పూర్వంలో ట్రంప్‌కు సలహాదారుగా పనిచేసిన ఎలాన్ మస్క్, ఇప్పుడు ఆయన నయా బిల్లుపై పగతీర్చుకునే స్థాయిలో స్పందించారు. "ప్రచారంలో ఖర్చులు తగ్గిస్తామంటూ మాటలు చెప్పి, అధికారంలోకి వచ్చాక చరిత్రలోనే అతిపెద్ద అప్పు తీసుకునే విధంగా ఓటేయడం అవమానకరం. అలాంటి ప్రతీ కాంగ్రెసు సభ్యుడు తలదించుకోవాలి. నేను చేయాల్సిన చివరి పని అయినా సరే, వాళ్లను వచ్చే ఎన్నికల్లో ఓడించేందుకు నేను పోరాడతాను," అంటూ తన ఎక్స్ (మాజీ ట్విట్టర్) ఖాతా ద్వారా ఆయన తీవ్రమైన హెచ్చరిక జారీ చేశారు.
వివరాలు
కొత్త పార్టీ పెడతానని మస్క్ హెచ్చరిక
ఈ వివాదంలో మరింత ఆసక్తి రేకెత్తించింది మస్క్ కొత్త రాజకీయ పార్టీ ఏర్పాటుపై చేసిన ప్రకటనతో. "ఈ అనాలోచిత, వృథా వ్యయాలతో కూడిన బిల్లు సెనేట్‌లో ఆమోదం పొందితే, వెంటనే 'అమెరికన్ పార్టీ'ని స్థాపిస్తాను. డెమోక్రట్స్-రిపబ్లికన్స్ లాంటి రెండు ముఖాల పార్టీ వ్యవస్థకు ఇది ప్రత్యామ్నాయమవుతుంది. ప్రజలకు నిజమైన గొంతు ఇవ్వాలంటే కొత్త రాజకీయ వేదిక అవసరం," అని మస్క్ స్పష్టం చేశారు. ఆయన ప్రకారం, వెయ్యి పేజీల బిల్లులో ప్రతీ అంశమూ దేశానికి హానికరమైనదే. లక్షలాది ఉద్యోగాలు మాయం కావచ్చన్న హెచ్చరికను కూడా ఆయన వినిపించారు.
వివరాలు
సెనేట్‌లో బిల్లుపై కీలక దశ
ప్రస్తుతం అమెరికా సెనేట్‌లో ఈ బిల్లుపై చర్చలు, ఓట్ల ప్రక్రియ మరాథాన్ మాదిరిగా కొనసాగుతున్నాయి. వచ్చే శుక్రవారం జరగనున్న స్వాతంత్ర్య దినోత్సవ వేడుకల నాటికి ఈ బిల్లును ఆమోదించి, అధ్యక్షుడి డెస్క్‌కి పంపేందుకు రిపబ్లికన్ పార్టీ ప్రణాళికను సిద్ధం చేసింది. సెనేట్‌లో రిపబ్లికన్లకు స్వల్ప మెజారిటీ ఉన్నప్పటికీ, ట్రంప్ పార్టీపై ఉన్న ప్రభావం వల్ల బిల్లుకు ఆమోదం దక్కే అవకాశముందని భావిస్తున్నారు.
వివరాలు
ప్రతినిధుల సభలో మరో పరీక్ష
అయితే, సెనేట్ ఆమోదించినా ప్రతినిధుల సభలో ఈ బిల్లుకు ఎదురులేని సవాళ్లు ఎదురయ్యే అవకాశముంది. అక్కడ కూడా రిపబ్లికన్లకు స్వల్ప ఆధిక్యమే ఉన్నప్పటికీ, ఇప్పటికే కొంతమంది సభ్యులు బిల్లును వ్యతిరేకిస్తున్నట్టు సంకేతాలిచ్చారు. ఇదే సమయంలో ట్రంప్, మస్క్ మధ్య జరిగిన ఈ బహిరంగ ఘర్షణ, సోషల్ మీడియాలో వ్యక్తిగత దూషణల స్థాయికి చేరినందున, రాజకీయ వాతావరణం మరింత వేడెక్కింది.
ట్విట్టర్ పోస్ట్ చేయండి
ఎలాన్ మస్క్ చేసిన ట్వీట్
Every member of Congress who campaigned on reducing government spending and then immediately voted for the biggest debt increase in history should hang their head in shame!
— Elon Musk (@elonmusk) June 30, 2025
And they will lose their primary next year if it is the last thing I do on this Earth.