Donald Trump: ఖతార్‌పై ఇజ్రాయెల్ దాడికి ముందు నెతన్యాహు నాకు సమాచారం ఇవ్వలేదు: మాట మార్చేసిన ట్రంప్
ఈ వార్తాకథనం ఏంటి
హమాస్ నేతలే లక్ష్యంగా ఖతార్ రాజధాని దోహాపై ఇటీవల ఇజ్రాయెల్ దాడులతో విరుచుకుపడిన సంగతి తెలిసిందే. ఈ దాడుల గురించి ఇజ్రాయెల్ అమెరికాతో ముందుగానే పంచుకున్నట్టు టెల్ అవీవ్ ప్రకటించిన విషయం తెలిసిందే. అందుకు యూఎస్ ప్రభుత్వం కూడా ముందుగా అంగీకారం తెలిపింది. అయితే, తాజాగా ఈ విషయం మీద అమెరికా అధ్యక్షుడు డొనాల్డ్ ట్రంప్ మాట మార్చడం సంచలనంగా మారింది. సోమవారం,స్థానిక కాలమానం ప్రకారం,ఓవల్ కార్యాలయంలో ట్రంప్ మీడియాతో మాట్లాడారు. ఇజ్రాయెల్ ప్రధాని నెతన్యాహు దాడుల గురించి తనకు ముందుగా చెప్పలేదన్నారు ఈసందర్భంగా నెతన్యాహు దాడుల గురించి ముందుగానే చెప్పారా అని ఒకరు ప్రశ్నించారు.
వివరాలు
దాడులకు కొద్ది గంటల ముందే ట్రంప్ కు సమాచారం
దీనికి ట్రంప్ బదులిస్తూ.. 'లేదు, వారు నాకు ఏమీ చెప్పలేదు' అని స్పష్టంగా తెలిపారు. అదేవిధంగా, భవిష్యత్తులో ఖతార్‌పై ఇజ్రాయెల్ మరో దాడికి పాల్పడదని ట్రంప్ హామీ ఇచ్చారు. టెల్ అవీవ్ వారు తమకు ముందస్తుగా సమాచారం అందజేసి, దాన్ని ఖతార్‌కి కూడా తెలియజేశామని ట్రంప్, వైట్ హౌస్ అధికారులు అప్పట్లో తెలిపారు. కానీ రాయిటర్స్ ప్రకారం, ఇజ్రాయెల్ దాడులకు కొద్ది గంటల ముందు మాత్రమే ట్రంప్ కు సమాచారం అందినట్టు ఆక్సియోస్ నివేదించింది. టెల్ అవీవ్ క్షిపణులు గాల్లో ఉన్న సమయంలో తమకు సమాచారం అందిందని, సమయం లేక ప్రతిస్పందించలేదని యూఎస్ అధికారులు వెల్లడించారు.
వివరాలు
ప్రకటన విడుదల చేసిన నెతన్యాహు కార్యాలయం
ఈ నేపథ్యంలో నెతన్యాహు కార్యాలయం ఒక ప్రకటన విడుదల చేసింది. అందులో 'దాడులపై వైట్‌హౌస్‌ వివరణ సరైనదే. హమాస్ నాయకులే లక్ష్యంగా దోహాలో జరిగిన దాడులు పూర్తిగా ఇజ్రాయెల్ సొంత ఆపరేషన్‌. దీన్ని మేమే ప్రారంభించి అమలు కూడా చేశాం. పూర్తి బాధ్యత మాదే' అని రాసుకొచ్చింది. కాగా, దాడులు మొదలైన తర్వాతే యూఎస్ నుంచి వారికి సమాచారం అందిందని ఖతార్ ఇప్పటికే తెలియజేసింది .
వివరాలు
దాడులను తీవ్రంగా పరిగణించిన ఖతార్
ఇంకొక కీలక విషయం ఏమిటంటే, కాల్పుల విరమణ కోసం యూఎస్ ప్రతిపాదన మేరకు ఖతార్ అధికారులు హమాస్ నేతలతో ఇటీవల దోహాలో సమావేశమయ్యారు. ఈ భేటీ జరుగుతున్న సమయంలో, ఇజ్రాయెల్ వైమానిక దాడులను నిర్వహించింది. ఈ దాడుల్లో ఎవరికీ ప్రాణహాని జరగలేదు. ఖతార్ ఈ చర్యను తీవ్రంగా ప్రతిస్పందించింది. ట్రంప్, నెతన్యాహునకు హెచ్చరిక చేస్తూ, ఖతార్ తమకు ముఖ్యమైన మిత్రదేశమని, దానిపై ఏ నిర్ణయం తీసుకునే ముందు ఇజ్రాయెల్ ఆచితూచి వ్యవహరించాలనూ స్పష్టం చేశారు.