EC: చట్టవిరుద్ధం అయితే 'ఎస్‌ఐఆర్' రద్దు: ఎన్నికల కమిషన్‌కు సుప్రీం హెచ్చరిక
ఈ వార్తాకథనం ఏంటి
బిహార్‌లో ఓటరు జాబితా ప్రత్యేక సమగ్ర సవరణ (Bihar SIR)పై ఇచ్చిన అభ్యంతరాలను పరిశీలిస్తూ, సుప్రీంకోర్టు ఎన్నికల కమిషన్ (ECI)కు హెచ్చరిక చేసింది. ఎన్నికల సంఘం చట్టప్రకారం తీసుకున్న నిర్ణయాల్లో ఏదైనా చట్టవిరుద్ధంగా కనిపిస్తే, మొత్తం 'ఎస్‌ఐఆర్'ను రద్దు చేయవచ్చని ధర్మాసనం స్పష్టం చేసింది. అయినప్పటికీ, రాజ్యాంగ సంస్థగా ఎన్నికల సంఘం తన విధుల్లో సరైన నిబంధనలను పాటించిందని కూడా కోర్టు పేర్కొంది. బిహార్‌లో ఈ ప్రత్యేక ఓటరు జాబితా సర్వేకు వ్యతిరేకంగా దాఖలైన ఫిర్యాదును పరిశీలిస్తున్న జస్టిస్ సూర్యకాంత్, జస్టిస్ జోయ్‌మాల్య బాగ్చిలు నేతృత్వంలోని ధర్మాసనం,ప్రస్తుత దశలో తాము తుది అభిప్రాయాన్ని ప్రకటించలేరని తెలిపింది. అక్టోబర్‌ 7న తుది వాదనలు విన్న తర్వాత తీర్పును వెలువరిస్తామని అత్యున్నత న్యాయస్తానం స్పష్టం చేసింది
వివరాలు
ఎన్నికల కమిషన్ అభ్యంతరాలను తోసిపుచ్చిన న్యాయస్థానం
ఇక బిహార్ ప్రత్యేక సమగ్ర సవరణలో (SIR) ఆధార్‌ను కూడా చట్టబద్ధమైన గుర్తింపు కార్డుగా పరిగణించాలని సుప్రీం కోర్టు ఇటీవల ఎన్నికల కమిషన్‌కు సూచనలు జారీ చేసింది. ఈ సూచనలున్నప్పటికీ, ఎన్నికల అధికారులు ఆధార్‌ను గుర్తింపు కార్డుగా అంగీకరించడంలో నిరాకరిస్తున్నారని ఫిర్యాదులు అందుతున్నాయి. న్యాయస్థానం ఎన్నికల కమిషన్ చూపిస్తున్న అభ్యంతరాలను తోసిపుచ్చింది.
వివరాలు
త్వరలో మరిన్ని ఆధారాలతో ఈసీ చేస్తున్న చట్ట వ్యతిరేక చర్యలను బయట పెడతాం: రాహుల్ గాంధీ
ఇక రాబోయే బిహార్ ఎన్నికల నేపథ్యంలో, ఎన్నికల సంఘం ఓటరు జాబితాల 'ప్రత్యేక సమగ్ర సవరణ' ద్వారా భాజపా ప్రభుత్వంతో కలిసి ఓట్లలో మోసానికి ప్రయత్నిస్తున్నారని విపక్ష కాంగ్రెస్ పార్టీ ఆరోపిస్తోంది. గత కొన్ని ఎన్నికల్లో ఇదే విధంగా ఓట్ల మోసాలు జరిగాయని కాంగ్రెస్ నేత రాహుల్ గాంధీ ఆరోపించారు. ఈ విషయానికి సంబంధించిన ఆధారాలను ఇప్పటికే ప్రజల ముందుకు తెచ్చామని, త్వరలో మరిన్ని ఆధారాలతో ఈసీ చేస్తున్న చట్టవిరుద్ధ చర్యలను వెలుగులోకి తీసుకురాగలమని ఆయన హెచ్చరించారు.