Heavy rains: హైదరాబాద్ లో భారీ వర్షం.. రంగారెడ్డి జిల్లా యాచారంలో 17.9,మెదక్ జిల్లా కేంద్రంలో 17.8 సెం.మీ.
ఈ వార్తాకథనం ఏంటి
తెలంగాణలోని పలుప్రాంతాల్లో ఆకాశానికి చిల్లు పడిందా అన్నట్లు ఒక్కసారిగా కుండపోత వాన కురిసింది. చూస్తుండగానే రోడ్లు ఏరులై పారాయి.గురువారం ఉదయం నుండే మధ్యాహ్నం వరకు మెదక్, యాదాద్రి భువనగిరి జిల్లాల్లో భారీ వర్షాలు కురిశాయి. మధ్యాహ్నం నుంచి సాయంత్రం వరకు రంగారెడ్డి, హైదరాబాద్ జిల్లాల్లో కూడా భారీ వర్షం కురిసింది. రాష్ట్రంలో అత్యధిక వర్షపాతం రంగారెడ్డి జిల్లా యాచారంలో 17.9 సెం.మీ.,మెదక్ జిల్లా కేంద్రంలో 17.8 సెం.మీ.,యాదాద్రి భువనగిరి జిల్లా ఆలేరు మండలం కొలనుపాకలో 17.3 సెం.మీ.,మోటకొండూరులో 16.5 సెం.మీ.,సిద్దిపేట జిల్లా దూల్మెట్టలో 13.6 సెం.మీ.,రంగారెడ్డి జిల్లా తటి అన్నారంలో 12.3 సెం.మీ., హనుమకొండ జిల్లా ఐనవోలు 11.9 సెం.మీ.,రంగారెడ్డి హయత్‌నగర్‌లో 11.4 సెం.మీ.,డిఫెన్స్ కాలనీలో 10.3 సెం.మీ.,మొయినాబాద్‌లో 9.3 సెం.మీ.గా నమోదైంది.
వివరాలు
హైదరాబాద్-విజయవాడ జాతీయ రహదారిపై స్తంభించిన ట్రాఫిక్
ప్రత్యేకంగా తూర్పు హైదరాబాద్ ప్రాంతంలో గాలి, వర్షం తీవ్రంగా విరుచుకుపడ్డాయి. గంటన్నర పాటు ఏకధాటిగా కురిసిన వర్షానికి హయత్‌నగర్ చుట్టుపక్కల ప్రాంతాలు జలమయమయ్యాయి. విజయవాడ జాతీయ రహదారిలో నీరు నిలిచిపోవడంతో ట్రాఫిక్ పూర్తిగా స్తంభించింది. వనస్థలిపురం నుంచి పెద్దఅంబర్‌పేట వరకు భారీగా ట్రాఫిక్ స్తంభించింది. విద్యార్థులు పాఠశాల నుంచి ఇంటికి చేరుకునే సమయంలో బడి బస్సులు కూడా రోడ్లపై నిలిచిపోయాయి. ప్రధాన రహదారుల నుంచి కాలనీలలోకి వరద నీరు చేరడంతో తక్కువ ఎత్తు ఉన్న ప్రాంతాల్లో ఇళ్లు నీటమునిగాయి. ముఖ్యంగా అబ్దుల్లాపూర్‌మెట్ మండలంలోని పలు ప్రాంతాలు వరద ముంచెత్తిన విషయం తెలిసిందే.
వివరాలు
అప్రమత్తంగా ఉండాలి: సీఎం రేవంత్‌రెడ్డి
మెదక్ జిల్లా కేంద్రంలో ఉదయం 9.30 గంటలకు ప్రారంభమైన వర్షం రెండు గంటల పాటు ఎప్పటిలాగే కురిసింది. మెదక్-హైదరాబాద్ ప్రధాన రహదారి జలమయమై విరామం లేకుండా నీరు నిలిచిపోయింది. రాందాస్‌చౌరస్తా, మహాత్మాగాంధీ రోడ్డు, ఆటోనగర్ ప్రాంతాల్లో ముఖ్యమైన రహదారులపై మోకాలి లోతు నీళ్లు నిలిచిన పరిస్థితి ఏర్పడింది. గాంధీనగర్‌లో కూడా అనేక ఇళ్లలో నీరు చేరిపోయింది. ఈ నేపథ్యంలో ముఖ్యమంత్రి రేవంత్‌ రెడ్డి రాష్ట్ర వ్యాప్తంగా అధికారులను అప్రమత్తంగా ఉండాలని ఆదేశించారు. పురాతన,అసురక్షిత ఇళ్లలో నివసిస్తున్న ప్రజలను ఖాళీ చేయించి,సురక్షిత ప్రాంతాలకు తరలించాలని,హైదరాబాద్‌లో హెచ్‌డిఆర్‌,జీహెచ్‌ఎంసీ,ఎస్డీఆర్‌ఎఫ్,అగ్నిమాపక విభాగం,ట్రాఫిక్, పోలీస్ శాఖల అధికారులతో సమన్వయం చేసుకుని ప్రజలకు ఎటువంటి ఇబ్బంది లేకుండా ముందస్తుగా చర్యలు తీసుకోవాలని సూచించారు.
వివరాలు
నేడు, రేపు భారీ వర్షాలు
ముఖ్యంగా కాలువలు, కాజ్‌వేలు, కల్వర్టులపై వరదలు పొంగే ప్రమాదం ఉందని గుర్తు చేస్తూ, ప్రజలు వాటిని దాటేప్పుడు అప్రమత్తంగా ఉండాలని సూచించారు. చెరువులు, కుంటలకు గండ్లు పడకుండా నీటిపారుదల శాఖ అధికారులు ముందస్తుగా జాగ్రత్తలు తీసుకోవాలని సూచన ఇవ్వడం జరిగింది. వాతావరణ శాఖ ప్రకారం, బంగాళాఖాతంలో ఏర్పడిన ఉపరితల ఆవర్తన ప్రభావంతో పలు జిల్లాల్లో ఈరోజు, రేపు భారీ వర్షాలు కురిసే అవకాశాలు ఉన్నాయని చెప్పారు. శుక్రవారం ఆసిఫాబాద్, మంచిర్యాల, సూర్యాపేట, మహబూబాబాద్ జిల్లాల్లో, శనివారం మహబూబాబాద్, వరంగల్, హనుమకొండ, జనగామ, యాదాద్రి భువనగిరి, రంగారెడ్డి, హైదరాబాద్ జిల్లాల్లో భారీగా వర్షాలు కురవచ్చని, మిగిలిన జిల్లాల్లో మోస్తరు వర్షాలు పడే అవకాశం ఉందని వివరించారు.