Lok Sabha: పార్లమెంటులో ప్రతిపక్ష నాయకుడిగా నాకు మాట్లాడే అవకాశం ఇవ్వట్లేదు: రాహుల్ గాంధీ
ఈ వార్తాకథనం ఏంటి
లోక్‌సభలో ప్రతిపక్ష నేతగా ఉన్న తనకు మాట్లాడే అవకాశం కల్పించడంలేదని కాంగ్రెస్‌ నేత రాహుల్ గాంధీ ఆరోపించారు. పార్లమెంట్‌ సమావేశాల్లో అధికార పక్ష సభ్యులు ఏకపక్షంగా వ్యవహరిస్తున్నారని విమర్శించారు. కేంద్ర రక్షణ మంత్రి సహా ప్రభుత్వంలోని ఇతర మంత్రులకు మాట్లాడే అవకాశం ఇవ్వబడుతున్నప్పటికీ, తనకు మాత్రం అభిప్రాయాలు వ్యక్తం చేసే అవకాశం ఇవ్వడం లేదని ఆయన మండిపడ్డారు. ప్రతిపక్ష నేతగా లోక్‌సభలో మాట్లాడే హక్కు తనకు ఉన్నా కూడా అలా అవకాశం నిరాకరించడం ప్రతిపక్షాల హక్కులను పరిగణించకపోవడమేనని ఆగ్రహం వ్యక్తం చేశారు. లోక్‌సభలో చర్చలు ప్రారంభమైన వెంటనే ప్రధాని నరేంద్ర మోదీ అక్కడినుంచి వెళ్లిపోయారన్నారు.
వివరాలు
రాజ్యసభలో చర్చలు
ఎన్డీఏ ప్రభుత్వం ప్రతి విషయంలో తమకు అనుకూలంగా ఉండే విధంగా కొత్త విధానాలను తీసుకొస్తోందని ఆయన విమర్శించారు. ఇక పార్లమెంట్‌ వర్షాకాల సమావేశాలు సోమవారం ప్రారంభమయ్యాయి. లోక్‌సభ, రాజ్యసభ సమావేశమైన తర్వాత 'ఆపరేషన్‌ సిందూర్‌'తో పాటు అనేక కీలక అంశాలపై చర్చ జరగాలని కోరుతూ లోక్‌సభలో ప్రతిపక్షాలు ఆందోళన చేపట్టాయి. ప్రతిపక్ష సభ్యులు తమ నిరసనను విరమించాలని సభాపతి పలు మార్లు విజ్ఞప్తి చేసినా వారు వినిపించకపోవడంతో లోక్‌సభను కొంతసేపు వాయిదా వేశారు. అదే సమయంలో రాజ్యసభలో చర్చలు కొనసాగుతున్నాయి.