Tamannaah Bhatia: తమన్నాతో మైసూర్ శాండల్ ఒప్పందం.. కన్నడ సంఘాలు తీవ్ర అభ్యంతరం
ఈ వార్తాకథనం ఏంటి
వందేళ్లకు పైగా చరిత్ర గల ప్రసిద్ధ మైసూరు శాండల్ సబ్బుకు బాలీవుడ్ నటి తమన్నా భాటియాను ప్రచారకర్తగా నియమించడం కర్ణాటక రాష్ట్రంలో పెద్ద హంగామా సృష్టిస్తోంది.
ప్రభుత్వ ఆధ్వర్యంలోని కర్ణాటక సోప్స్ అండ్ డిటర్జెంట్స్ లిమిటెడ్ తయారుచేసే ఈ సబ్బుకు ముంబై నటిని బ్రాండ్ అంబాసిడర్‌గా నియమించిన విషయంపై స్థానిక కన్నడ సంఘాలు, కార్యకర్తలు,ప్రతిపక్ష పార్టీలు తీవ్ర ఆగ్రహాన్ని వ్యక్తం చేస్తున్నారు.
కర్ణాటక ప్రభుత్వం మైసూర్ శాండల్ సబ్బు ప్రచారానికి తమన్నాతో ఒప్పందం చేసుకొని, రెండు సంవత్సరాల కాలానికి రూ.6.2 కోట్లు చెల్లించేందుకు అంగీకరించింది.
వివరాలు
మైసూరు మహారాజు కృష్ణరాజ వొడయార్ ప్రారంభించిన సబ్బు
ఈ నిర్ణయం ప్రాంతీయ అస్తిత్వం,ప్రాతినిధ్యం విషయంలో పెద్ద చర్చలకు దారితీసింది.
కర్ణాటక సాంస్కృతిక వారసత్వంలో భాగమైన ఈ బ్రాండ్‌కు స్థానిక కన్నడ నటి మాత్రమే ప్రచారకర్తగా ఉండాల్సిన అవసరం ఉన్నదని విమర్శకులు వాదిస్తున్నారు.
వారు ఈ నియామకాన్ని వెంటనే రద్దు చేయాలనీ డిమాండ్ చేస్తూ, కర్ణాటక రక్షణ వేదిక రాష్ట్ర అధ్యక్షుడు నారాయణ గౌడ ముఖ్యమంత్రి సిద్ధరామయ్యకు లేఖ రాశారు.
"ఈ నిర్ణయం అనైతికంగా,బాధ్యతారాహిత్యంగా ఉంది. కన్నడ ప్రజల భావోద్వేగాలకు దీన్ని గట్టి దెబ్బతీసింది. 1916లో నాటి మైసూరు మహారాజు కృష్ణరాజ వొడయార్ ప్రారంభించిన ఈ సబ్బుకు ఎన్నో సంవత్సరాల వారసత్వం ఉంది" అని ఆయన తెలిపారు.
వివరాలు
మార్కెటింగ్ నిపుణులతో సంప్రదింపుల అనంతరం ఈ నిర్ణయం
బ్రాండ్ అంబాసిడర్‌గా బాలీవుడ్ నటిని ఎంపిక చేయడం ద్వారా రాష్ట్ర ప్రభుత్వం కర్ణాటక కళాకారులను అవమానించిందని ఆయన ఎత్తిచూపారు.
కర్ణాటక పరిశ్రమల శాఖ మంత్రి ఎం.బి. పాటిల్ ఈ విమర్శలను పక్కన పెట్టి, మార్కెటింగ్ నిపుణులతో సంప్రదింపుల అనంతరం ఈ నిర్ణయం తీసుకున్నట్లు స్పష్టం చేశారు.
"మైసూర్ శాండల్ సబ్బును కర్ణాటకనే కాకుండా జాతీయ, అంతర్జాతీయ స్థాయిలో మరింత గుర్తింపునిస్తుంది మా లక్ష్యం.
దీపికా పదుకొణె, రష్మిక మందన్న, పూజా హెగ్డే, కియారా అద్వానీ వంటి ప్రముఖుల పేర్లను పరిశీలించాం.
దేశవ్యాప్తంగా ఉన్న ఆదరణ, తక్కువ ఖర్చు, 2.8 కోట్లకు పైగా సోషల్ మీడియా ఫాలోవర్లున్న దృష్ట్యా తమన్నాను ఎంపిక చేశాం" అని మంత్రి వివరణ ఇచ్చారు.