Suryakumar Yadav: తొలి బంతికే ఔట్.. టీ20ల్లో సూర్యకుమార్కు 26వ డక్
ఈ వార్తాకథనం ఏంటి
ఐపీఎల్ 2026 సీజన్లో ముంబయి ఇండియన్స్కు భారీ షాక్ తగిలింది. రాయల్ చాలెంజర్స్ బెంగళూరుతో జరిగిన మ్యాచ్లో స్టార్ బ్యాటర్ సూర్యకుమార్ యాదవ్ తొలి బంతికే ఔటై నిరాశపరిచాడు. దీంతో టీ20 క్రికెట్లో అతని డక్స్ సంఖ్య 26కు చేరింది. ఆదివారం రాయ్పూర్లోని షహీద్ వీర్ నారాయణ్ సింగ్ ఇంటర్నేషనల్ స్టేడియంలో జరిగిన ఈ మ్యాచ్లో ముంబై ఇండియన్స్ ఆరంభంలోనే కుదేలైంది. మూడో ఓవర్ ముగిసే సమయానికి జట్టు 28 పరుగులకే మూడు వికెట్లు కోల్పోయింది. ముందుగా ర్యాన్ రికెల్టన్, రోహిత్ శర్మ ఔటవగా.. అనంతరం సూర్యకుమార్ యాదవ్ క్రీజులోకి వచ్చాడు.
వివరాలు
టీ20లో 26వ డక్ ఔట్..
అయితే రోహిత్ శర్మను ఔట్ చేసిన భువనేశ్వర్ కుమార్, అదే ఓవర్లో తర్వాతి బంతికే సూర్యకుమార్ను కూడా పెవిలియన్కు పంపించాడు. ఆఫ్ స్టంప్ బయట పడిన ఫుల్లిష్ లెంగ్త్ బంతిని సూర్యకుమార్ భారీ షాట్ ఆడేందుకు ప్రయత్నించాడు. కానీ బంతి ఎడ్జ్ తీసుకుని క్యాచ్గా మారింది. దీంతో అతడు తొలి బంతికే డక్గా వెనుదిరిగాడు. ఈఎస్పీఎన్ క్రిక్ ఇన్ఫో గణాంకాల ప్రకారం, టీ20 క్రికెట్లో ఇది సూర్యకుమార్ యాదవ్కు 26వ డక్. ఇప్పటివరకు అతడు 371 మ్యాచ్లు (345 ఇన్నింగ్స్లు) ఆడి 9,654 పరుగులు చేశాడు. అతని సగటు 34.47గా ఉంది.
వివరాలు
ఆర్సీబీపై మూడో డక్ ఔట్..
ఐపీఎల్లో మాత్రం ఇది అతని 12వ డక్. సూర్యకుమార్ ఇప్పటివరకు 177 ఐపీఎల్ మ్యాచ్లు (162 ఇన్నింగ్స్లు) ఆడి 4,506 పరుగులు సాధించాడు. ఆర్సీబీపై కూడా ఇది సూర్యకుమార్కు మూడో డక్ కావడం గమనార్హం. బెంగళూరుతో 22 మ్యాచ్లు ఆడిన అతడు మొత్తం 538 పరుగులు చేశాడు. ఈ జట్టుపై కూడా అతని సగటు 33.62గానే ఉంది. ఇక భువనేశ్వర్ కుమార్ బౌలింగ్లో సూర్యకుమార్ రికార్డు ఆశించిన స్థాయిలో లేదు. ఐపీఎల్లో భువీకి ఎదురుగా 9 ఇన్నింగ్స్లు ఆడిన సూర్యకుమార్ కేవలం 35 పరుగులు మాత్రమే చేశాడు. 28 బంతులు ఎదుర్కొన్న అతడి స్ట్రైక్ రేట్ 125గా ఉంది. భువనేశ్వర్ ఇప్పటివరకు అతడిని రెండు సార్లు ఔట్ చేశాడు.