Nikki Haley: భారత్‌ స్నేహాన్ని కోల్పోతే అమెరికాకు వ్యూహాత్మక వైఫల్యం తప్పదు: నిక్కీ హేలీ హెచ్చరిక
ఈ వార్తాకథనం ఏంటి
రష్యా నుంచి భారత్‌ భారీగా చమురు దిగుమతి చేసుకుంటోందనే కారణంతో అమెరికా ప్రభుత్వం న్యూదిల్లీపై కఠిన సుంకాలు విధించిన విషయం తెలిసిందే. దీంతో ఇరుదేశాల సంబంధాల్లో కొంత ఒడుదొడుకులు నెలకొన్నాయి. ఈ పరిణామాలపై అమెరికా మాజీ ఐక్యరాజ్య సమితి రాయబారి నిక్కీ హేలీ స్పందించారు. వాషింగ్టన్‌ న్యూదిల్లీతో తలెత్తిన విభేదాలను త్వరగా పరిష్కరించుకోవాలని ఆమె సూచించారు. భారత్‌ స్నేహాన్ని కోల్పోతే అది అమెరికాకు ఒక పెద్ద వ్యూహాత్మక వైఫల్యంగా మిగిలిపోతుందని ఆమె ఒక పత్రికలో రాసిన వ్యాసంలో హెచ్చరించారు.
వివరాలు
భారత్‌ను ప్రత్యర్థిగా కాక భాగస్వామిగా చూడాలి
ప్రస్తుతం భారత్‌-అమెరికా సంబంధాలు సంక్లిష్ట దశలో ఉన్నాయని హేలీ అభిప్రాయపడ్డారు. భారత్‌ను స్వేచ్ఛాయుతమైన విశ్వసనీయ భాగస్వామిగా పరిగణించాలని, చైనాను చూసినట్లుగా ప్రత్యర్థిగా చూడరాదని ఆమె స్పష్టం చేశారు. రష్యా నుంచి బీజింగ్‌ కూడా విస్తృతంగా చమురు కొనుగోలు చేస్తున్నప్పటికీ, అమెరికా దానిపై ఎలాంటి ఆంక్షలు విధించకపోవడం సరికాదని ఆమె విమర్శించారు. ఆసియాలో చైనా పెరుగుతున్న ప్రభావాన్ని తగ్గించాలని అమెరికా నిజంగానే భావిస్తే, భారతదేశానికి మరింత దగ్గరవ్వాల్సిందేనని నిక్కీ హేలీ సూచించారు. లేకుంటే అది అమెరికా వ్యూహంలో తీవ్ర వైఫల్యమే అవుతుందని ఆమె హెచ్చరించారు.
వివరాలు
అభివృద్ధి చెందుతున్న భారత సామర్థ్యం
భారత్‌ ప్రపంచంలో వేగంగా ఎదుగుతున్న ఆర్థిక వ్యవస్థల్లో ఒకటని హేలీ విశ్లేషించారు. అమెరికాలో ఉత్పత్తి చేయలేని చవకైన దుస్తులు, మొబైల్‌ ఫోన్లు, సౌర ఫలకాలు వంటి ఉత్పత్తులను చైనా స్థాయిలో తయారు చేసే సామర్థ్యం భారత్‌కు ఉందని ఆమె అభిప్రాయపడ్డారు. రక్షణ రంగంలో ఇజ్రాయెల్‌ వంటి అమెరికా మిత్రదేశాలతో భారత్‌ బలమైన సహకారాన్ని పెంచుకుంటోందని, మధ్యప్రాచ్యంలోనూ భారత్‌కు గణనీయమైన ఆదరణ పెరుగుతోందని ఆమె గుర్తుచేశారు. రాబోయే సంవత్సరాల్లో భారత్‌ ప్రాధాన్యం మరింతగా పెరుగుతుందని పేర్కొన్నారు.
వివరాలు
చైనాను అధిగమించిన భారత్‌
2023లోనే భారత్‌ ప్రపంచంలో అత్యధిక జనాభా కలిగిన దేశంగా చైనాను అధిగమించిందని ఆమె గుర్తుచేశారు. ఈ సందర్భంలో అమెరికా అధ్యక్షుడు డొనాల్డ్‌ ట్రంప్‌ భారత్‌ను "డెడ్‌ ఎకానమీ" అని పేర్కొన్న వ్యాఖ్యలను నిక్కీ హేలీ తీవ్రంగా తప్పుబట్టారు. ప్రపంచంలోనే వేగంగా ఎదుగుతున్న ఆర్థిక వ్యవస్థల్లో భారత్‌ ఒకటని ఆమె వివరించారు. భారత్‌ ఆర్థిక, వ్యూహాత్మక సామర్థ్యాలు పెరుగుతున్న కొద్దీ, ప్రపంచాన్ని ఆధిపత్యంలోకి తెచ్చుకోవాలనే చైనా ఆకాంక్షలు గణనీయంగా దెబ్బతింటాయని ఆమె స్పష్టం చేశారు.