IPO: డిసెంబర్‌లో పబ్లిక్ ఇష్యూల సందడి.. రూ.20,000 కోట్ల పబ్లిక్ ఇష్యూలు!
ఈ వార్తాకథనం ఏంటి
వచ్చే నెలలో(డిసెంబర్‌) కూడా పబ్లిక్ ఇష్యూల హడావుడి కొనసాగనుంది.
వివిధ రంగాల నుంచి కనీసం 10 కంపెనీలు దాదాపు రూ.20,000 కోట్ల నిధులను సమీకరించే అవకాశం ఉందని మర్చంట్ బ్యాంకర్లు అంచనా వేస్తున్నారు.
ఈ ఐపీఓలలో కొత్త షేర్ల జారీతో పాటు ఆఫర్ ఫర్ సేల్ విధానం కూడా ఉంటుందని తెలుస్తోంది.
వివరాలు
మార్కెట్ సానుకూలత పెరుగుతోంది
మహారాష్ట్ర అసెంబ్లీ ఎన్నికలు, ఉత్తరప్రదేశ్ ఉప ఎన్నికల ఫలితాలు మార్కెట్ సానుకూల వాతావరణాన్ని తీసుకువచ్చాయని ఆన్‌లైన్ బ్రోకరేజీ సంస్థ ప్రతినిధి తెలిపారు.
ఈ పరిణామాలు ఐపీఓ కార్యకలాపాలు, నిధుల సమీకరణ వేగవంతం కావడానికి దోహదం చేస్తాయని పేర్కొన్నారు.
వివరాలు
డిసెంబరులో ఐపీఓలకు సిద్ధంగా ఉన్న కంపెనీలు
విశాల్ మెగామార్ట్
ఆఫర్ ఫర్ సేల్ రూపంలో జరిగే ఈ ఐపీఓలో ప్రమోటర్ సమాయత్ సర్వీసెస్ ఎల్‌ఎల్‌పీ ద్వారా కంపెనీ రూ.8,000 కోట్ల నిధులను సమీకరించాలని లక్ష్యంగా పెట్టుకుంది.
జెమోలాజికల్ ఇన్‌స్టిట్యూట్ (ఇండియా) లిమిటెడ్
బ్లాక్‌స్టోన్ యాజమాన్యం ఉన్న ఈ వజ్రాల గ్రేడింగ్ సంస్థ రూ.4,000 కోట్ల నిధులను సమీకరించాలని భావిస్తోంది. ఈ ఐపీఓలో రూ.1,250 కోట్ల తాజా షేర్లు, రూ.2,750 కోట్ల ఆఫర్ ఫర్ సేల్ షేర్లు అందుబాటులో ఉంటాయి.
అవాన్సే ఫైనాన్షియల్ సర్వీసెస్
ఈ సంస్థ మొత్తం రూ.3,500 కోట్ల నిధులను ఐపీఓ ద్వారా సమీకరించాలనే ఉద్దేశ్యంతో ఉంది. ఇందులో రూ.1,000 కోట్ల తాజా షేర్లు, రూ.2,500 కోట్ల ఆఫర్ ఫర్ సేల్ షేర్లు ఉంటాయి.
వివరాలు
2024లో ఐపీఓల ప్రగతి
ఇతర సంస్థలు: సాయి లైఫ్ సైన్సెస్, పరాస్ హెల్త్‌కేర్, డీఏఎం కేపిటల్ అడ్వయిజర్స్, సురక్షా డయాగ్నొస్టిక్, మమతా మెషినరీ, ట్రాన్స్‌రైల్ లైటింగ్ వంటి సంస్థలు కూడా డిసెంబర్‌లో ఐపీఓలకు సిద్ధమవుతున్నాయి.
ఈ సంవత్సరం ఇప్పటివరకు 75కి పైగా కంపెనీలు పబ్లిక్ ఇష్యూల ద్వారా మొత్తం రూ.1.3 లక్షల కోట్లు సమీకరించాయి.
హ్యుందాయ్ మోటార్ ఇండియా, స్విగ్గీ, ఎన్‌టీపీసీ గ్రీన్ ఎనర్జీ, బజాజ్ హౌసింగ్ ఫైనాన్స్, ఓలా ఎలక్ట్రిక్ మొబిలిటీ వంటి సంస్థలు ఈ జాబితాలో ఉన్నాయి.
2023లో మాత్రం 57 కంపెనీలు రూ.49,436 కోట్ల నిధులను మాత్రమే సమీకరించాయి. ఇదే విధంగా 2024లో ఐపీఓల రన్ మరింత ఉత్సాహంగా కొనసాగనుందని నిపుణులు భావిస్తున్నారు.