ECI: 'అసంబద్ధం': రాహుల్‌గాంధీ ఆరోపణలను తోసిపుచ్చిన ఈసీ.. డిక్లరేషన్‌ ఇవ్వాలని డిమాండ్
ఈ వార్తాకథనం ఏంటి
దేశంలో ఓట్ల దొంగతనం జరుగుతోందని లోక్‌సభ ప్రతిపక్ష నేత, కాంగ్రెస్ సీనియర్‌ నాయకుడు రాహుల్‌ గాంధీ ఘాటుగా ఆరోపించారు. గురువారం ఢిల్లీలో ఇండియా కూటమి తరపున ఏర్పాటు చేసిన విందులో ఆయన ప్రజెంటేషన్ ఇచ్చి, బీజేపీ,ఎన్నికల సంఘం కలసి ఓట్ల విషయంలో కుట్ర పన్నాయని తీవ్రస్థాయిలో విమర్శించారు. తాజాగా ఈ ఆరోపణలపై భారత ఎన్నికల సంఘం స్పందించింది. రాహుల్‌ చేసిన వ్యాఖ్యలను అసంబద్ధమైన విశ్లేషణగా పేర్కొంది. తప్పుదోవ పట్టించే వివరణలు వ్యాప్తి చేసినందుకు రాహుల్‌ ప్రమాణపూర్వక ఫిర్యాదు సమర్పించాల్సిందిగా లేదా దేశ ప్రజలకు బహిరంగంగా క్షమాపణ చెప్పాల్సిందిగా డిమాండ్ చేసింది. ఎన్నికల కమిషన్‌పై చేసిన ఆరోపణలు నిజమేనని రాహుల్‌ నమ్మితే, ఆ విషయాన్ని డిక్లరేషన్‌ రూపంలో రాతపూర్వకంగా సంతకం చేసి సమర్పించాలని కోరింది.
వివరాలు
ఓటర్ల మోసం గురించి ఘాటైన ఆరోపణలు
ఒకవేళ ఆ డిక్లరేషన్‌ సమర్పించకపోతే, ఆయన చేసిన విశ్లేషణలు, తీర్మానాలు అసంబద్ధమైనవిగా పరిగణించక తప్పదని స్పష్టం చేసింది. లేకపోతే దేశానికి క్షమాపణ చెప్పాలని మళ్లీ డిమాండ్ చేసింది. బిహార్‌లోని స్పెషల్‌ ఇంటెన్సివ్‌ రివిజన్‌ (SIR), ఉప రాష్ట్రపతి ఎన్నికలు, ఇతర ముఖ్యాంశాలపై చర్చించేందుకు గురువారం సాయంత్రం రాహుల్‌ గాంధీ ఇండియా కూటమి తరఫున విందు ఏర్పాటు చేశారు. ఈ సమావేశంలో ఆయన ఓటర్ల మోసం గురించి ఘాటైన ఆరోపణలు చేశారు.
వివరాలు
సాక్ష్యాలతో కూడిన డిక్లరేషన్‌ను సమర్పించాలని డిమాండ్ చేసిన బీజేపీ
2024 లోక్‌సభ ఎన్నికల సందర్భంలో కర్ణాటక అసెంబ్లీ విభాగంలో భారీ స్థాయిలో ఓటర్ల మోసం బయటపడిందని ఆయన వెల్లడించారు. రాహుల్‌ చేసిన ఆరోపణలను బీజేపీ కూడా తీవ్రంగా ఖండించింది. ఆరోపణలు నిజమైతే, వాటికి సంబంధించిన సాక్ష్యాలతో కూడిన డిక్లరేషన్‌ను సమర్పించాలని రాహుల్‌ను డిమాండ్ చేసింది. ఒకవేళ ఆయన అలాంటి సాక్ష్యాలను సమర్పించడంలో విఫలమైతే, చేసిన ఆరోపణలు పూర్తిగా అవాస్తవమని తేలిపోతుందని స్పష్టం చేసింది.