ICC CHAMPIONS TROPHY: ఇప్పటివరకు ఛాంపియన్స్ ట్రోఫీలు గెలిచిన జట్లు ఇవే..! ఆ జట్లకు కెప్టెన్స్ ఎవరంటే?
ఈ వార్తాకథనం ఏంటి
2025 ఛాంపియన్స్ ట్రోఫీ ఎడిషన్ ఫిబ్రవరి 19 నుండి మార్చి 9 వరకు జరుగనుంది.
ఈ మెగా టోర్నమెంట్‌ను పాకిస్థాన్, యూఏఈ సంయుక్తంగా ఆతిథ్యమిస్తున్నాయి.
చివరిసారిగా 2017లో ఈ టోర్నీ నిర్వహించారు. చాలా సంవత్సరాల తర్వాత మళ్లీ జరుగుతున్న ఈ పోటీలో 8 జట్లు కప్పు గెలుచుకునేందుకు పోటీ పడనున్నాయి.
ఇప్పటివరకు 8 ఛాంపియన్స్ ట్రోఫీ టోర్నమెంట్లు ముగిశాయి.
భారత్ ఈ పోటీల్లో రెండుసార్లు విజేతగా నిలిచింది.
రోహిత్ శర్మ కెప్టెన్సీలో భారత్ ఈసారి విజయం సాధిస్తే, మూడో టైటిల్‌ను సొంతం చేసుకునే అవకాశం ఉంది.
అయితే, గత ఛాంపియన్స్ ట్రోఫీల్లో ఏ జట్లు విజేతలుగా నిలిచాయో, వారి కెప్టెన్లు ఎవరో ఇప్పుడు పరిశీలిద్దాం.
వివరాలు
1998 ఛాంపియన్స్ ట్రోఫీ
మొదటి ఛాంపియన్స్ ట్రోఫీని 'ఐసీసీ నాకౌట్' పేరుతో నిర్వహించారు. బంగ్లాదేశ్‌లో జరిగిన ఈ పోటీలో హాన్సీ క్రోంజే నేతృత్వంలోని దక్షిణాఫ్రికా విజేతగా నిలిచింది. ఫైనల్లో వెస్టిండీస్‌ను ఓడించి టైటిల్‌ను గెలుచుకుంది.
2000 ఛాంపియన్స్ ట్రోఫీ
ఈ ఎడిషన్ కెన్యాలో నిర్వహించారు. ఫైనల్లో న్యూజిలాండ్, భారత్ మధ్య పోటీ నెలకొనగా, స్టీఫెన్ ఫ్లెమింగ్ నాయకత్వంలోని న్యూజిలాండ్ విజయం సాధించింది. ఇదే న్యూజిలాండ్‌కు తొలి ఐసీసీ టోర్నమెంట్ టైటిల్.
2002 ఛాంపియన్స్ ట్రోఫీ
శ్రీలంకలో జరిగిన ఈ టోర్నమెంట్ ఫైనల్ వర్షం కారణంగా రెండు సార్లు అర్థంతరంగా ముగిసింది. ఫలితంగా భారత్, శ్రీలంక సంయుక్త విజేతలుగా నిలిచాయి. అప్పట్లో భారత్‌కు సౌరవ్ గంగూలీ, శ్రీలంకకు సనత్ జయసూర్య నేతృత్వం వహించారు.
వివరాలు
2004 ఛాంపియన్స్ ట్రోఫీ
ఈ టోర్నీకి ఇంగ్లాండ్ ఆతిథ్యమిచ్చింది. ఫైనల్లో బ్రియాన్ లారా నాయకత్వంలోని వెస్టిండీస్ జట్టు ఇంగ్లండ్‌ను ఓడించి టైటిల్‌ను గెలుచుకుంది.
2006 ఛాంపియన్స్ ట్రోఫీ
భారత్‌లో జరిగిన ఈ టోర్నమెంట్‌లో రికీ పాంటింగ్ నాయకత్వంలోని ఆస్ట్రేలియా, ఫైనల్లో వెస్టిండీస్‌ను ఓడించి ఛాంపియన్‌గా నిలిచింది.
2009 ఛాంపియన్స్ ట్రోఫీ
దక్షిణాఫ్రికాలో జరిగిన ఈ టోర్నీలో, వరుసగా రెండోసారి రికీ పాంటింగ్ కెప్టెన్సీలో ఆస్ట్రేలియా విజయం సాధించింది. ఫైనల్లో న్యూజిలాండ్‌ను ఓడించి టైటిల్‌ను కైవసం చేసుకుంది.
వివరాలు
2013 ఛాంపియన్స్ ట్రోఫీ
2013లో ఎంఎస్ ధోని నాయకత్వంలోని భారత జట్టు ఛాంపియన్స్ ట్రోఫీని కైవసం చేసుకుంది. బర్మింగ్‌హామ్‌లో జరిగిన ఫైనల్లో భారత్, ఇంగ్లండ్‌ను ఓడించి ట్రోఫీ గెలుచుకుంది.
2017 ఛాంపియన్స్ ట్రోఫీ
ఇంగ్లాండ్, వేల్స్ వేదికగా 2017లో జరిగిన ఈ టోర్నమెంట్ ఫైనల్లో పాకిస్థాన్ భారత్‌పై ఘన విజయం సాధించింది. సర్ఫరాజ్ అహ్మద్ నేతృత్వంలో పాక్ జట్టు ప్రపంచ క్రికెట్‌ను ఆశ్చర్యంలో ముంచేసింది.