Russia-Ukraine war: రష్యా-ఉక్రెయిన్ యుద్దానికి 3 సంవత్సరాలు.. యుద్ధ ప్రభావం ఈ దేశాలపై ఎలా ఉందంటే..?
ఈ వార్తాకథనం ఏంటి
ఉక్రెయిన్-రష్యా యుద్ధం ప్రారంభమై మూడు సంవత్సరాలు పూర్తయ్యాయి.
ఈరోజుతో (సోమవారం) అది నాలుగో సంవత్సరంలోకి ప్రవేశిస్తోంది.
ప్రస్తుతం ఉక్రెయిన్ ఆర్థిక వ్యవస్థ క్షీణతను ఎదుర్కొంటోంది. అలసిపోయిన సైనికులు తమ స్థానాన్ని నిలబెట్టుకోవడానికి పోరాడుతూనే ఉన్నాయి.
అమెరికా-రష్యా మధ్య శాంతి చర్చలు
అమెరికా అధ్యక్షుడు డొనాల్డ్ ట్రంప్ నేతృత్వంలో,రష్యాతో శాంతి ఒప్పందాన్ని వేగంగా అమలు చేయాలని ప్రయత్నాలు జరుగుతున్నాయి.
అయితే, ఈ చర్చలలో ఉక్రెయిన్ భాగస్వామ్యం లేకపోవడంతో కైవ్, యూరోపియన్ దేశాలు ఆశ్చర్యానికి గురయ్యాయి.
అయినప్పటికీ, యూరప్, కెనడా ఉక్రెయిన్‌కు అండగా నిలుస్తున్నాయి.
సోమవారం, యూరప్, కెనడా దేశాల అగ్రనేతలు ఉక్రెయిన్‌కు తమ నిరంతర మద్దతును తెలియజేయడానికి కైవ్‌కు చేరుకున్నారు.
వివరాలు
యుద్ధం కేవలం ఉక్రెయిన్ కోసమే కాదు
యూరోపియన్ కమిషన్ అధ్యక్షురాలు ఉర్సులా వాన్ డెర్ లేయన్, కెనడా ప్రధాని జస్టిన్ ట్రూడో, యూరోపియన్ కౌన్సిల్ అధ్యక్షుడు ఆంటోనియో కోస్టా రాజధాని రైల్వే స్టేషన్‌లో ఉక్రేనియన్ అధికారులతో భేటీ అయ్యారు.
"ఈ పోరాటం కేవలం ఉక్రెయిన్ మనుగడ కోసం మాత్రమే కాదు, యూరప్ భవిష్యత్తును కూడా ప్రభావితం చేస్తుంది," అని వాన్ డెర్ లేయన్ స్పష్టం చేశారు.
ముఖ్యంగా, రష్యాతో ట్రంప్ చేపడుతున్న శాంతి చర్చలు ఉక్రెయిన్ ప్రయోజనాలకు వ్యతిరేకంగా ఉండొచ్చన్న ఆందోళనల నేపథ్యంలో, ఉక్రెయిన్ రక్షణ వ్యవస్థను మరింత బలోపేతం చేయాలనే దానిపై కైవ్‌లో జెలెన్‌స్కీతో కీలక చర్చలు జరిగాయి.
వివరాలు
ట్రంప్-పుతిన్ సమావేశం?
యుద్ధాన్ని ముగించేందుకు ట్రంప్ దూకుడుగా వ్యవహరిస్తూ, మాస్కోతో ప్రత్యక్ష చర్చలు జరపాలని ఒత్తిడి తీసుకువస్తున్నారు.
వారాంతంలో రష్యా ఉప విదేశాంగ మంత్రి సెర్గీ ర్యాబ్కోవ్ వెల్లడించిన ప్రకారం, రాబోయే రోజుల్లో అమెరికా-రష్యా అధికారి స్థాయి చర్చలు కొనసాగనున్నాయి.
అంతేగాక, ట్రంప్, రష్యా అధ్యక్షుడు వ్లాదిమిర్ పుతిన్ త్వరలో ముఖాముఖి భేటీ అయ్యే అవకాశముందని నివేదికలు సూచిస్తున్నాయి.
యూరప్ చొరవ
ట్రంప్ తీసుకుంటున్న వైఖరిని యూరోపియన్ నాయకులు సమర్థించడంలేదు.
ఉక్రెయిన్ కోసం మద్దతును బలోపేతం చేయడానికి యూరోపియన్ యూనియన్ వచ్చే నెల 6న బ్రస్సెల్స్‌లో అత్యవసర సమావేశాన్ని నిర్వహించనుంది.
వివరాలు
ఉక్రెయిన్ నష్టాలు
ఈ యుద్ధం ఉక్రెయిన్‌కు తీవ్ర నష్టాలను మిగిల్చింది.ఇన్‌స్టిట్యూట్ ఫర్ ది స్టడీ ఆఫ్ వార్ నివేదిక ప్రకారం,2022 నుంచి ఉక్రెయిన్ దాదాపు 11%భూభాగాన్ని కోల్పోయింది.
2014నుంచి ఇప్పటి వరకు 18%భూమి రష్యా అధీనంలోకి వెళ్లింది.ఇందులో క్రిమియా,డాన్‌బాస్ ప్రాంతాలు కూడా ఉన్నాయి.
ఆర్థికంగా చూస్తే,దేశ GDP తీవ్రంగా పడిపోయింది.రష్యాలో ద్రవ్యోల్బణం 9.5% ఉంటే,ఉక్రెయిన్‌లో అది 12%కు పెరిగింది.
అంతర్జాతీయ ద్రవ్య నిధి (IMF) ప్రకారం,యుద్ధం ప్రారంభంలో రష్యా GDP -1.3%కి పడిపోయింది.
అయితే,తరువాతి రెండు సంవత్సరాల్లో అది 3.6% వృద్ధిని సాధించింది.కానీ ప్రస్తుతం అధిక వడ్డీ రేట్లు,ద్రవ్యోల్బణం ప్రభావంతో రష్యా ఆర్థిక వ్యవస్థ కూడా ఒత్తిడిలో ఉంది.
ఉక్రెయిన్ ఆర్థిక మంత్రిత్వ శాఖ అంచనా ప్రకారం,ఈ సంవత్సరం GDP వృద్ధి 2.7%కి మందగించే అవకాశముంది.
వివరాలు
వలసలు, ప్రాణనష్టం
యుద్ధ ప్రభావంగా 60 లక్షల మందికిపైగా ఉక్రేనియన్లు యూరప్‌కు వలస వెళ్ళారు.
ముఖ్యంగా, జర్మనీ, పోలాండ్, చెక్ రిపబ్లిక్‌లో శరణార్థుల సంఖ్య ఎక్కువగా ఉంది.
మరో 10 లక్షల మంది రష్యాలో ఉన్నారు. ఐక్యరాజ్యసమితి నివేదిక ప్రకారం, యుద్ధంలో గాయపడిన లేదా మరణించిన వారి సంఖ్య 40,000కి పైగా ఉంది.
వీరిలో 6,203 మంది పురుషులు, 669 మంది పిల్లలు ఉన్నారు. మరణించిన వారిలో చాలా మంది వైమానిక దాడులు, ఫిరంగి దాడుల కారణంగా ప్రాణాలు కోల్పోయారు.
వివరాలు
రష్యా ఎంత ఆర్థిక నష్టాన్ని చవిచూసింది?
యుఎస్ డిఫెన్స్ మినిస్ట్రీ (పెంటగాన్) 2023 అంచనా ప్రకారం, రష్యా యుద్ధంలో సైన్యం, ఆయుధాలు, లాజిస్టిక్స్ కోసం 211 బిలియన్ డాలర్లు (సుమారు రూ. 18 లక్షల కోట్లు) ఖర్చు చేసింది. 2025 నాటికి ఈ మొత్తం $300 బిలియన్లకు మించవచ్చు.
పాశ్చాత్య దేశాల ఆర్థిక ఆంక్షల కారణంగా రష్యా ఆర్థిక వ్యవస్థకు పెద్ద దెబ్బ తగిలింది. నష్టాలన్నీ కలిపితే యుద్ధం వల్ల ఇప్పటి వరకు 1-1.5 లక్షల కోట్ల డాలర్లు (దాదాపు రూ. 80-125 లక్షల కోట్లు) నష్టం వాటిల్లింది.
వివరాలు
యుద్ధం తర్వాత రెండు దేశాల్లో ద్రవ్యోల్బణం పెరిగింది
గణాంకాల ప్రకారం, యుద్ధం రెండు పొరుగు దేశాల పౌరులపై నిరంతర ప్రభావాన్ని చూపుతోంది. రష్యాలో 9.5 శాతం, ఉక్రెయిన్‌లో 12 శాతం ధరలు పెరిగాయి.
అంతర్జాతీయ ద్రవ్య నిధి (IMF) డేటా ప్రకారం, రష్యా ఆర్థిక వ్యవస్థ ప్రస్తుతం చితికిపోయింది.
అధిక వడ్డీ రేట్లు, ద్రవ్యోల్బణం కారణంగా, వివిధ రంగాలలో అమ్మకాలు, ఆర్డర్లు తగ్గుతున్నాయి. ఇది నేరుగా పౌరులపై ప్రభావం చూపుతోంది. ఉక్రెయిన్‌లో పరిస్థితి మరింత దారుణంగా ఉంది.
వివరాలు
ఉక్రెయిన్‌కు భారీ ఎదురుదెబ్బ..
ఉక్రెయిన్‌కు అమెరికా అతిపెద్ద మిత్రదేశం. 2022 నుంచి ఇప్పటి వరకు 95 బిలియన్ డాలర్ల (రూ. 8.19 లక్షల కోట్లు) విలువైన సైనిక, మానవతా, ఆర్థిక సహాయాన్ని అందించింది.
అయితే, ట్రంప్ పరిపాలనలో ఇది ప్రమాదంలో పడింది. ఇటీవల, అధ్యక్షుడు డొనాల్డ్ ట్రంప్ సహాయం కోసం బదులుగా అరుదైన ఖనిజాలను అడిగారు, అయితే జెలెన్స్కీ దానిని తిరస్కరించారు.
USAID నిధులను నిలిపివేయడం కూడా ఉక్రెయిన్‌పై ప్రధాన ప్రభావాన్ని చూపింది. ఉక్రెయిన్ అనేక ప్రాజెక్టులను నిలిపివేయవలసి వచ్చింది.