Cm chandrababu: రాయలసీమకు శాశ్వత నీటి సమస్య పరిష్కార దిశగా పోలవరం-బనకచర్ల ప్రాజెక్టు.. అమిత్‌షాకు వివరించిన సీఎం చంద్రబాబు
ఈ వార్తాకథనం ఏంటి
రాయలసీమలో నెలకొన్న తీవ్ర నీటి సమస్యకు శాశ్వత పరిష్కారం చూపేందుకు పోలవరం-బనకచర్ల ప్రాజెక్టును ప్రతిపాదించిన విషయాన్ని ముఖ్యమంత్రి చంద్రబాబు నాయుడు కేంద్ర హోంమంత్రి అమిత్‌ షాకు వివరించారు. పోలవరం నుండి కర్నూలు జిల్లా బనకచర్ల రెగ్యులేటర్‌ వరకు 200 టీఎంసీల వరదనీటిని తరలించే విధంగా ప్రాజెక్టును రూపొందించామని తెలిపారు. ఈ ప్రాజెక్టు ద్వారా సముద్రంలోకి వృథాగా వెళ్లే గోదావరి వరద నీటిని వినియోగించాలనే ఉద్దేశంతో రూపొందించామని చెప్పారు. ఇది పూర్తయితే రాయలసీమ ప్రాంతానికి బహుళ ప్రయోజనాలు కలుగుతాయని వివరించారు. ఎగువ,దిగువ రాష్ట్రాల అవసరాలు తీరి కూడా గోదావరిలో సుమారు 90 నుంచి 120 రోజులు వరద జలాలు మిగిలే అవకాశం ఉందని, ఆ మిగిలిన నీటిని ఉపసంహరించుకునే హక్కు ఆంధ్రప్రదేశ్‌కు ఉందని పేర్కొన్నారు.
వివరాలు
రాష్ట్ర ఆర్థిక వ్యవస్థను తిరిగి పునరుద్ధరించేందుకు కేంద్రం సహకారం
మంగళవారం జరిగిన మాజీ ప్రధాని పీవీ నరసింహారావు స్మారకోపన్యాస కార్యక్రమం అనంతరం, చంద్రబాబు అమిత్‌ షాతో ఆయన నివాసంలో సుమారు 40నిమిషాలు సమావేశమయ్యారు. ఈ భేటీలో రాష్ట్ర ఆర్థిక,రాజకీయ పరిస్థితులపై సమగ్రంగా చర్చించారు. గత సంవత్సర కాలంగా ఆంధ్రప్రదేశ్‌కు కేంద్రం నుంచి వచ్చిన మద్దతుకు కృతజ్ఞతలు తెలియజేశారు. వైకాపా పాలనలో ధ్వంసమైన రాష్ట్ర ఆర్థిక వ్యవస్థను తిరిగి పునరుద్ధరించేందుకు కేంద్రం సహకారం అవసరమని చెప్పారు. ఇప్పటికీ రాష్ట్రానికి ఆర్థికవనరుల లోపం కొనసాగుతుండటంతో మరింత మద్దతు కావాలని కోరారు. విభజన నేపథ్యంలో ఆంధ్రప్రదేశ్‌ ఎదుర్కొంటున్న ఆర్థిక నష్టాన్ని దృష్టిలో ఉంచుకుని కేంద్ర వనరుల్లో రాష్ట్రానికి సముచిత వాటా కేటాయించాలని 16వ ఆర్థిక సంఘానికి నివేదిక సమర్పించామని, దీనిపై కేంద్రం దృష్టి సారించాలని హోంమంత్రికి చెప్పారు.
వివరాలు
ప్రత్యేక భేటీలు, పరిశ్రమలపై చర్చలు
గోవా గవర్నర్‌గా అశోక్‌ గజపతిరాజును నియమించినందుకు ప్రధాని మోదీకి, హోంమంత్రి అమిత్‌ షాకు చంద్రబాబు ప్రత్యేక కృతజ్ఞతలు తెలిపారు. అనంతరం 1-జన్‌పథ్‌లో ఉన్న తన అధికార నివాసంలో నితిఆయోగ్‌ సభ్యుడు వీకే సారస్వత్‌ను కలిసిన చంద్రబాబు, రాష్ట్రంలో ఏరోస్పేస్‌, డిఫెన్స్‌ పరిశ్రమలను అభివృద్ధి చేసే దిశగా చర్చించారు. బెంగళూరుకు సమీపంలో ఉన్న లేపాక్షిలో తగిన భూములు అందుబాటులో ఉన్నందున అక్కడ పరిశ్రమల ఏర్పాటుకు నితిఆయోగ్‌ మద్దతు అందించాలని కోరారు. అలాగే, దిల్లీ మెట్రో రైల్‌ కార్పొరేషన్‌ ఎండీ వికాస్‌ కుమార్‌తో భేటీ అయి, విశాఖపట్నం, విజయవాడ మెట్రో రైల్‌ ప్రాజెక్టులకు అవసరమైన సాంకేతిక మరియు ఆర్థిక సహాయం కోరారు.
వివరాలు
కేంద్ర మంత్రి అశ్వినీ వైష్ణవ్‌కు పరామర్శ
రైల్వే, ఐటీ, ఎలక్ట్రానిక్స్‌ శాఖల కేంద్ర మంత్రి అశ్విని వైష్ణవ్‌ తండ్రి దౌలాల్‌ వైష్ణవ్‌ ఇటీవల మరణించడంతో, చంద్రబాబు ఆయన నివాసానికి వెళ్లి పరామర్శించారు. దౌలాల్‌ చిత్రపటానికి పుష్పాంజలి ఘటించి సంతాపం తెలిపారు. బుధవారం కీలక సమావేశాలు బుధవారం మధ్యాహ్నం 2.30 గంటలకు కేంద్ర జలశక్తి మంత్రి సీఆర్‌ పాటిల్‌ నేతృత్వంలో జరగనున్న పోలవరం-బనకచర్ల ప్రాజెక్టుపై జరిగే ఏపీ, తెలంగాణ రాష్ట్రాల ముఖ్యమంత్రుల సమావేశంలో చంద్రబాబు పాల్గొననున్నారు. అనంతరం ఆర్థిక మంత్రి నిర్మలా సీతారామన్‌ను కలవనున్నారు. ఉదయం కేంద్ర కార్మిక, క్రీడలు మరియు యువజన వ్యవహారాల మంత్రి మన్‌సుఖ్‌ మాండవీయతో సమావేశం జరగనుంది. రాత్రికి చంద్రబాబు "కాన్ఫెడరేషన్‌ ఆఫ్‌ ఇండియన్‌ ఇండస్ట్రీస్‌ (CII)" సదస్సుకు హాజరుకానున్నారు.