River Interlinking: తెలుగు రాష్ట్రాల్లో నదుల అనుసంధానానికి ఎనిమిది అవకాశాలు
ఈ వార్తాకథనం ఏంటి
తెలుగు రాష్ట్రాల్లో నదుల అనుసంధానానికి మొత్తం ఎనిమిది అవకాశాలు ఉన్నట్టు కేంద్ర జలశక్తి శాఖ సహాయ మంత్రి రాజభూషణ్ చౌధరి ప్రకటించారు. గురువారం రోజు లోక్‌సభ సమావేశంలో కౌశలేంద్రకుమార్ అనే సభ్యుడు అడిగిన ప్రశ్నకు స్పందిస్తూ, దేశవ్యాప్తంగా నదుల అనుసంధాన కార్యక్రమాల పురోగతిని వివరించారు. ఆంధ్రప్రదేశ్, తెలంగాణ, కర్ణాటక, మహారాష్ట్ర, ఒడిశా, తమిళనాడు, పుదుచ్చేరి వంటి రాష్ట్రాలకు కృష్ణా, గోదావరి, పెన్నా నదుల అనుసంధానం ద్వారా కలిగే ప్రయోజనాలను కేంద్ర మంత్రి వివరించారు. ఈ ప్రక్రియ ద్వారా నీటి లభ్యత మెరుగవడం వల్ల తాగునీరు, సాగునీటి సమస్యలు కొంతవరకు తీరతాయని చెప్పారు.
వివరాలు
నోడల్ ఏజెన్సీగా.. జాతీయ జలాభివృద్ధి సంస్థ
నదుల అనుసంధానానికి కేంద్రం 'జాతీయ ప్రణాళిక' (నేషనల్ పర్స్పెక్టివ్ ప్లాన్ - ఎన్‌పీపీ)ను రూపొందించిందని, దీనిని అమలు చేయడానికి జాతీయ జలాభివృద్ధి సంస్థ (ఎన్‌డబ్ల్యూడీఏ)ను నోడల్ ఏజెన్సీగా నియమించిందని పేర్కొన్నారు. దేశవ్యాప్తంగా మొత్తం 30 నదులను అనుసంధానించేందుకు గుర్తించామని, వీటిలో 11 నదుల అనుసంధానానికి వివరణాత్మక ప్రాజెక్టు నివేదికలు (డీపీఆర్‌లు) సిద్ధమయ్యాయని, మిగిలిన వాటికి నైతిక సాధ్యత నివేదికలు (ఫీజిబిలిటీ రిపోర్టులు) తయారయ్యాయని తెలిపారు.
వివరాలు
గోదావరి జలాల మళ్లింపు కోసం ప్రత్యామ్నాయ అధ్యయనాలు
జలాల కొరత ఉన్న నదీ ప్రాంతాలకు మిగులు నీటిని తరలించడం ద్వారా వరదలు, కరువుల ప్రభావాన్ని తగ్గించవచ్చని స్పష్టం చేశారు. ఈ విషయంలో సాంకేతిక మార్గదర్శకాలతో పాటు, అత్యంత సంక్లిష్ట భౌగోళిక పరిస్థితులు ఉన్న ప్రాంతాల్లో వరద నియంత్రణ కోసం కేంద్రం ఆర్థిక సాయాన్ని అందిస్తోందని వివరించారు. గోదావరి నదిలోని మణిభద్ర,ఇచ్చంపల్లి డ్యాంల నిర్మాణాలపై రాష్ట్రాల మధ్య ఏకాభిప్రాయం లేని నేపథ్యంలో, గోదావరి జలాల మళ్లింపు కోసం ప్రత్యామ్నాయ అధ్యయనాలను నిర్వహిస్తున్నట్టు కేంద్ర మంత్రి తెలిపారు.