Mangalagiri: మంగళగిరిలో నైపుణ్య గణన సర్వే.. వచ్చే నెల 3న ప్రయోగాత్మకంగా మొదలు
భారతదేశంలోనే మొదటిసారిగా నైపుణ్య గణన(skill Census) నిర్వహించేందుకు ఆంధ్రప్రదేశ్ లోని కూటమి ప్రభుత్వం సిద్దమైంది. రాష్ట్ర నైపుణ్యాభివృద్ధి సంస్థ ద్వారా వచ్చే నెల సెప్టెంబరు 3న ప్రయోగాత్మకంగా మంగళగిరి నియోజకవర్గంలో నిర్వహించేందుకు కసరత్తు చేస్తోంది. ఈ నైపుణ్య సర్వేకు వినియోగించే యాప్‌ తయారీ దాదాపుగా పూర్తయింది. సర్వేతోపాటుగా అభ్యర్థులు నేరుగా తమ వివరాలను నమోదు చేసుకునేందుకు కూడా ఇందులో అవకాశం ఉంది. సర్వే పూర్తయిన అనంతరం వెబ్‌సైట్‌ను అందుబాటులో ఉంచితే కొత్తగా మార్కెట్‌లోకి వచ్చేవారు తమ వివరాలను నమోదు చేసుకునేందుకు అవకాశం ఉంటుందని అధికారులు యోచిస్తున్నారు.
స్కిల్ సెన్సస్‌ను ఎలా లెక్కిస్తారు
స్కిల్ సెన్సస్‌తో పాటు నాగార్జున యూనివర్సిటీలోనూ విద్యార్థుల నుంచి సమాచారం సేకరిస్తారు. సర్వే ద్వారా రాష్ట్రవ్యాప్తంగా సమాచారం సేకరించి, డేటాను విశ్లేషణ చేసేందుకు దాదాపు 8 నెలల సమయం పడుతుందని నైపుణ్యాభివృద్ధి సంస్థ అంచనా వేసింది. ఈ సర్వేకోసం ఒక్కో గ్రామ, వార్డు సచివాలయం నుంచి ఆరుగురు చొప్పున ఉద్యోగులను వినియోగించనున్నారు. వీరికి ఈ నెలాఖరులో రెండు విడతలుగా ట్రైనింగ్ ఇస్తారు.ఈ ట్రైనింగ్ 23, 24, 30, 31 తేదీలలో నిర్వహిస్తారు. ట్రైనింగ్ అయ్యాక అపాయింట్ అయ్యిన ఉద్యోగులు ఇంటింటికీ వెళ్లి ట్యాబ్‌ల్లో సమాచారం సేకరిస్తారు. 25 రకాల ప్రశ్నల ద్వారా సమాచారం సేకరిస్తారు. సంఘటిత రంగంలో ఉద్యోగాలు చేస్తున్న వారి పీఎఫ్ ఖాతాలు,అసంఘటిత రంగంలో ఉంటే ఈ-శ్రమ్ ద్వారా వివరాలు తీసుకోనున్నారు.
సర్వే అనంతరం ఏం చేస్తారు?
ఈ సర్వే ద్వారా సేకరించిన సమాచారం దాదాపు 20 ఏళ్లపాటు నైపుణ్య శిక్షణ, ఉపాధి కల్పనకు ఉపయోగపడుతుందని అధికారులు అంచనా వేస్తున్నారు. ఈ సర్వే ద్వారా పిల్లలో ఉన్న నైపుణ్యాల గుర్తించి వారికీ ఎవరికి ఏ డొమైన్‌లో శిక్షణ అవసరం , నైపుణ్య కళాశాలలు, హబ్‌లు, నూతన కళాశాలలు, వర్సిటీల్లోనూ కేంద్రాలు ఏర్పాటు చేసి ట్రైనింగ్ ఇవ్వనున్నారు. ఈ ట్రైనింగ్ అనంతరంఅభ్యర్థులకు సర్టిఫికెట్లు ఇస్తారు. మార్కెట్ లోకి వచ్చే కంపెనీలకు ఎలాంటి నైపుణ్యాలు కావాలో కూడా వివరాలు తీసుకుంటారు. తదనుగుణంగా ట్రైనింగ్ ఇచ్చి, ఆయా కంపెనీలకు అనుసంధానం చేస్తారు. ఈ ట్రైనింగ్ లకు ప్రధాన మంత్రి కౌశల్‌ వికాస్‌ యోజన, కేంద్ర ప్రభుత్వ సెక్టార్‌ స్కిల్స్‌ కౌన్సిల్స్‌ సేవలను కూడా వినియోగించుకోనున్నారు.
ఏమేం వివరాలు సేకరిస్తారు?
అక్షరాస్యులు? నిరక్షరాస్యులు? ఉద్యోగులు? చదువుకుని ఉద్యోగం రాని వారు? ఉద్యోగం సంఘటిత రంగమా? అసంఘటిత రంగమా? నిరుద్యోగుల విద్యార్హతలు? పీహెచ్ఎ, ఎంఎస్, డిగ్రీ, ఇంటర్మీడి యట్, పదో తరగతి, ఎనిమిదో తరగతి? బీటెక్ చదివితే డొమైన్ నాలెడ్జ్ ఉందా? ఇలా 25 రకాల ప్రశ్నల ద్వారా సమాచారం సేకరిస్తారు. సంఘటిత రంగంలో ఉద్యోగాలు చేస్తున్న వారి పీఎఫ్ ఖాతాలు, అసంఘటిత రంగంలో ఉంటే ఈ-శ్రమ్ ద్వారా వివరాలు తీసుకోనున్నారు.
